अध्यात्म आणि दैवी शक्तीच्या नावाखाली महिलांचे लैंगिक शोषण करणाऱ्या भोंदू बाबा अशोक खरात याचे काळे कारनामे एकामागून एक समोर येत आहेत. लैंगिक शोषणाच्या आरोपाखाली अटकेत असलेल्या अशोक खरातच्या घर आणि कार्यालयावर पोलिसांनी छापेमारी केली आहे. पोलिसांनी टाकलेल्या या छाप्यात केवळ कागदपत्रांचा खजिनाच नाही, तर मोठ्या आर्थिक गैरव्यवहाराचे जाळेही समोर आले आहे.
तब्बल १३१ बनावट बँक खाती
काही दिवसांपूर्वी पोलिसांनी अशोक खरातच्या नाशिकमधील तृप्तबाला बंगल्याची झडती घेतली. या झडतीत पोलिसांना असंख्य आधार कार्ड आणि पॅनकार्ड मिळाले आहेत. या कागदपत्रांचा वापर करून अशोक खरातने बनावट बँक खाती उघडल्याचा संशय पोलिसांनी व्यक्त केला आहे. या प्राथमिक तपासात तब्बल १३१ बनावट बँक खाती उघडल्याचे समोर आल्याने पोलीस प्रशासनात खळबळ उडाली आहे.
आधार कार्ड आणि पॅन कार्डच्या झेरॉक्स घ्यायचा अन्…
अशोक खरात हा आपल्याकडे येणाऱ्या भक्तांकडून विविध विधी किंवा कामांच्या बहाण्याने आधार कार्ड आणि पॅन कार्डच्या झेरॉक्स घेत असे. मिळालेल्या माहितीनुसार, त्याचे काही पंटर (सहकारी) जाणीवपूर्वक भक्तांची वैयक्तिक माहिती गोळा करत होते. या कागदपत्रांचा गैरवापर करून अनेक भक्तांच्या नावावर बनावट बँक खाती उघडण्यात आली. अनेक खात्यांना स्वतःचाच मोबाईल नंबर लिंक करून आर्थिक व्यवहारांवर नियंत्रण मिळवले. तसेच पतसंस्थांमधील खात्यांवर स्वतःला नॉमिनी लावून भविष्यातील आर्थिक लाभाचे नियोजन केले.
केवळ नाशिकच नव्हे, तर अहिल्यानगर आणि पुणे या ठिकाणीही अशाच प्रकारची बनावट खाती उघडण्यात आल्याची शक्यता वर्तवण्यात येत आहे. एका लैंगिक शोषण प्रकरणातील पीडितेने दिलेल्या जबाबातून या प्रकरणाला वाचा फुटली. त्यानतंर आता हे संपूर्ण प्रकरण एका मोठ्या संघटित गुन्हेगारीकडे वळताना दिसत आहे.
आणखी काही मोठे मासे अडकण्याची शक्यता
सरकारवाडा पोलीस स्टेशनमध्ये दाखल झालेल्या गुन्ह्यानंतर पोलिसांनी या प्रकरणाचा तपास अधिक तीव्र केला आहे. यानंतर भक्तांना टार्गेट करून त्यांची फसवणूक करण्यासाठी अशोक खरातने हे आर्थिक जाळे विणल्याचा पोलिसांचा प्राथमिक अंदाज आहे. या छाप्यातून मिळालेल्या पुराव्यांमुळे अशोक खरातच्या अडचणीत मोठी वाढ झाली आहे. त्यामुळे यामागे आणखी काही मोठे मासे अडकण्याची शक्यता वर्तवण्यात येत आहे.
