America Iran Ceasefire : अमेरिका आणि इराण यांच्यात शस्त्रसंधी झाली आहे. या शस्त्रसंधीनुसार दोन्ही देश पुढील दोन आठवड्यांसाठी एकमेकांवर हल्ले करणार नाहीत. या शस्त्रसंधीनंतर इराणनेही होर्मुझच्या समुद्रधुनीतून व्यापारी जहाजांना जाऊ देण्यास सहमती दर्शवली आहे. ही शस्त्रसंधी होताच जागतिक पातळीवर कच्च्या तेलाच्या किमतीत 17 टक्क्यांपर्यंत घसरण झाली आहे. शस्त्रसंधीनंतर संपूर्ण जगावरील उर्जासंकट टळल्याची भावना व्यक्त केली जात आहे. ही शस्त्रसंधी प्रत्यक्षात होण्यासाठी पाकिस्तानने मोठी भूमिका बजावल्याचे सांगितले जात होते. परंतु आता चीनने समोर येत पडद्यामागे काय काय घडलं? याची सविस्तर माहिती दिली आहे.
शस्त्रसंधीत चीनची नेमकी भूमिका काय आहे?
युद्ध सुरू झाल्यानंतर 40 व्या दिवशी अखेर इराण-अमेरिका यांच्यात शस्त्रसंधी झाली आहे. पाकिस्तानचे पंतप्रधान शाहबाज शरीफ हे आम्ही या शस्त्रसंधीसाठी खूप महत्त्वाची भूमिका बजावली आहे, ससे सांगत आहेत. परंतु आता चीनने समोर येत शस्त्रसंधीची खरी कहाणी सांगितली आहे. खुद्द अमेरिकेचे राष्ट्रआध्यक्ष डोनाल्ड ट्रम्प यांनीदेखील चीनच्या या भूमिकेचा उल्लेख केला. इराण युद्ध सुरू झाल्यानंतर शांततेसाठी तसेच संघर्ष थांबवण्यासाठी चीन सातत्याने प्रयत्न करत आहे, असे चीनच्या पराराष्ट्र मंत्रालयाचे प्रवक्ते माओ निंग यांनी म्हटले आहे.
चीनच्या मंत्र्यांने केला 26 वेळा कॉल
ही शस्त्रसंधी घडून यावी यासाठी चीनचे परराष्ट्रमंत्री वांग यांनी अमेरिका आणि इराणच्या परराष्ट्र मंत्र्यांना एकूण 26 वेला कॉल केले. तसेच मध्य पूर्वेतील वादाच्या मुद्द्यावर चीन सरकारच्या विशेष दूतानेही दोन्ही देशांत राजनैतिक चर्चा घडवूनन आणली, असेही माओ यांनी सांगितले. तसेच मध्य पूर्वेत शांतता प्रस्थापित व्हावी यासाठी चीन आणि पाकिस्तानने संयुक्तपणे पाच सूत्री प्रस्ताव ठेवला आहे, असेही माओ म्हणाले आहेत. एक जबाबदार देश म्हणून आम्ही आखाती प्रदेशात शांतता प्रस्थापित करण्यासाठी कार्यरत राहू, असेही त्यांनी सांगितले.
ट्रम्प यांनी केला चीनचा उल्लेख
दरम्यान, खुद्द डोनाल्ड ट्रम्प यांनीही चीनच्या योगदानाचा उल्लेख केला. डोनाल्ड ट्रम्प मंगळवारी (7 एप्रिल) एएफपी या न्यूज एजन्सीसोबत बोलत होते. यावेळी बोलताना चीननेच इराणला शस्त्रसंधीसाठी तयार केले. तसेच चीनमुळेच इराण चर्चेसाठी तयार झाला, असे सांगितले होते.
