अजित पवार यांच्या विमान अपघाताचा तपास वेगाने सुरू आहे. सुरूवातीला या विमानाचे पायलट अचानक बदलले असल्याची माहिती समोर आली होती. त्यामुळे अनेकांनी या विमान अपघातावर शंका उपस्थित केली होती. मात्र आता मुख्यमंत्री देवेंद्र फडणवीस यांनी या अपघाताबाबत विधानसभेत माहिती दिली आहे. विमानाचा पायलट अचानक बदलण्यात आला होता का? याबाबत फडणवीस यांनी सविस्तर माहिती दिली आहे. याबाबत सविस्तर माहिती जाणून घेऊयात.
काय म्हणाले मुख्यमंत्री?
अजित पवार यांच्या विमान अपघातावर बोलताना मुख्यमंत्री फडणवीस म्हणाले की, 27 जानेवारीला सायंकाळी 7 वाजण्याच्या सुमारात अजित पवार यांचा मुंबई ते बारामती हा प्रवास निश्चित झाला. या दौऱ्याची माहिती अजित दादांच्या खाजगी सचिवांकडून अॅरो एअर क्राफ्ट सेल्स आणि चार्टड प्रायव्हेट लिमिटेड या कंपनीच्या प्रतिनिधींना देण्यात आली. त्यानंतर 28 तारखेला असणाऱ्या दौऱ्यासाठी 8 वाजून 45 मिनिटांनी व्हीएसआर कंपनीचे विमान बुक करण्यात आले.
विमान उतरण्यापूर्वीच कोसळून अपघात
दुसऱ्या दिवशी सकाळी पायलट सुमित कपूर यांची ब्रेथ अॅनालायझर टेस्ट 7 वाजून 9 मिनिटांनी आणि शांभवी पाठक यांची टेस्ट 7.13 वाजता करण्यात आली. यात त्यांनी अल्कोहल सेवन केल्याचे समोर आलेले नाही. त्यानंतर अजित पवार 7 वाजून 52 मिनिटांनी विमानतळावर पोहोचले. सकाळी 8 वाजून 12 मिनिटांनी विनामाने उड्डाण केले आणि विमान बारामतीला उतरण्यापूर्वी कोसळले. यात अजित पवार यांच्यासह 5 जणांचा मृत्यू झाला. या विमानात स्फोटक पदार्थ नसल्याचे समोर आले आहे, तसेच या विमानातून इंधानाचे कॅन नेल्याचे समोर आलेले नाही.
विमानाचा पायलट बदलण्यात आला का याबाबत बोलताना मुख्यमंत्री म्हणाले की, दिनांक 27 जानेवारी 2026 रोजी रात्री 9 वाजून 11 मिनिटांनी स्लॉट्स अलॉटमेंट झाली. यात कॅप्टन साहिल मदान आणि कॅप्टन यश यांची तात्पुरती नेमणूक करण्यात आली होती. अशाप्रकारे क्रूची माहिती देऊन स्लॉट अलॉट करण्याची पद्धत आहे. त्यांनंतर पायलट आणि को पायलटची नेमणूक करण्यात येते अशी माहिती कंपनीने दिली आहे.
पायलट कधी बदलले?
कंपनीच्या अधिकाऱ्यांनी या दौऱ्यासाठी शेड्यूल रोस्टरमध्ये या दौऱ्यासाठी कॅप्टन राहुल ओबेरॉय आणि दिलीप सिंग यांची पायलट म्हणून रात्री 22 वाजून 42 मिनिटांनी नेमणूक केली. परंतू पायलट राहुल ओबेरॉय यांनी त्यांचे पोट खराब असल्याने त्यांनी सकाळच्या फ्लाईट ऐवजी संध्याकाळी लातूरला जाणाऱ्या विमानाची ड्यूटी देण्याची मागणी केली. त्यामुळे टीमने कॅप्टन सुमित कपूर आणि शांभवी पाठक यांची नेमणूक केली. या दोघांच्या नावाचे रोस्टर रात्री 11 वाजून 54 मिनिटांनी व्हॉट्सअॅप ग्रुपवर पाठवले. त्यामुळे ऐनवेळी कोणत्याही पायलटची नेकणूक करण्यात आलेली नव्हती. आदल्या रात्रीच पायलटची नेमणूक करण्यात आली होती. या दोन्ही पायलटने पुरेसा आराम केला होता.
