इराण-इस्रायल युद्ध अजूनही संपलेले नाही. या युद्धात रोज अनेकांचा बळी जातोय. इराणमधील परिस्थिती तर खूपच बिकट आहे. तेथील सर्वोच्च नेते अयातुल्लाह अली खामेनेई यांच्या हत्येनंतर भविष्यात या देशाचे नेतृत्त्व कोणाकडे असेल? याची संंपूर्ण जगाला उत्सुकता लागली होती. असे असतानाच आता इराणने अयातुल्लाह अली खामेनेई यांचे द्वितीय पुत्र मोजतबा खामेनेई यांच्याकडे देशाचे नेतृत्त्व सोपवले आहे. परंतु अमेरिकेने मात्र मोजतबा यांच्या नेतृत्त्वाला विरोध केलेला आहे. आमच्या मर्जीच्या विरोधातील माणूस सर्वोच्च स्थानावर असेल तर आम्ही त्याचाही खात्मा करू, असा इशारा अमरिकेचे राष्ट्राध्यक्ष डोनाल्ड ट्रम्प यांनी दिलेला आहे. असे असतानाच आता रशियाने संपूर्ण जगाची झोप उडवणारी भूमिका घेतली आहे. त्यांनी आम्हाला मोजतबा यांचे नेतृत्व मान्य असल्याचे सांगितले असल्याने अमेरिकेचे टेन्शन वाढले आहे.
पुतीन यांनी नेमकी काय भूमिका घेतली?
व्लादिमीर पुतीन यांनी अयातुल्ला मोजतबा खामेनेई यांच्या नियुक्तीचे स्वागत केले आहे. “रशिया हा इराणचा विश्वासू सहकारी राहिलेला आहे. सध्या इराण सध्या मोठ्या शस्त्रांच्या हल्ल्यांचा समना करत आहे. अशा स्थितीत सर्वोच्च पद सांभाळण्यासाठी खूप हिंमत लागते. मी इराणला पूर्ण पाठिंबा देतो,” असे पुतीन म्हणाले आहेत.
डोनाल्ड ट्रम्प यांच्याकडून केला जातोय विरोध
दुसरीकडे डोनाल्ड ट्रम्प यांनी मात्र मोजतबा यांच्या नियुक्तीवर आक्षेप घेतला आहे. त्यांनी याआधीच अयातुल्ला खामेनेई यांचा मुलगा मला इराणच्या सर्वोच्च पदावर बसलेला नको आहे. माझा याला विरोध आहे. इराणमध्ये शांतता आणि सौहार्द प्रस्थापित करणारा नेता मला हवा आहे, असे मत ट्रम्प यांनी व्यक्त केलेले आहे. मोजतबा यांना आमचा पाठिंबा नसेल तर ते फार काळ या पदावर राहणे शक्य नाही, असा इशाराही त्यांनी यावेळी दिला आहे.
भविष्यात नेमकं काय घडणार?
दरम्यान, मोजतबा यांच्या नियुक्तीला अमेरिकेने विरोध केल्यामुळे नेमकं काय होणार? हे पाहणं आता महत्त्वाचं ठरणार आहे. दुसरीकडे रशियाने मोजतबा यांच्या नियुक्तीचे स्वागत केल्याने भविष्यात युद्ध चिघळलेच तर पुतीन नेमके कोणाच्या बाजूने असणार हे पाहणे महत्त्वाचे ठरणार आहे.
