जगात दररोज वेगवेगळ्या घटना घडत असतात. यातील काही घटना सोशल मीडियावर तुफान व्हायरल होत असतात. आताही थायलंडमधील एका लग्नाचे फोटो सोशल मीडियावर मोठ्या प्रमाणात व्हायरल झाले आहेत. एका 37 वर्षांच्या महिलेने एकाच वेळी दोन पुरुषांशी लग्न केले आहे. विशेष म्हणजे हे लग्न एकाच मंडपात झाले. या लग्नातील दोन्ही वर ऑस्ट्रियाचे रहिवासी आहेत. या अनोख्या लग्नाबाबत सविस्तर माहिती जाणून घेऊयात.
समोर आलेल्या माहितीनुसार, दुआंगदुआन केत्सारो या महिलेने दोन्ही पुरुषांसोबत दीर्घकाळ रिलेशनमध्ये राहिल्यानंतर लग्न करण्याचा निर्णय घेतला. तिघांच्या परस्पर संमतीने लग्नाचा हा निर्णय घेण्यात आला. हे लग्न पूर्णपणे पारंपरिक पद्धतीने पार पडले. या सोहळ्यात कुटुंबीय आणि जवळचे मित्र सहभागी झाले होते. मात्र एकाच महिलेने दोघांशी एकाच मंडपात लग्न केल्यामुळे चर्चांना उधाण आले आहे.
नात्याची सुरुवात कशी झाली?
दुआंगदुआनची पाच वर्षांपूर्वी पटाया येथे निवृत्त ऑस्ट्रियन पोलिस अधिकारी रोमन यांच्याशी ओळख झाली होती. नंतर तिची भेट रोमनच्या जवळच्या मित्र मैकी याच्याशी झाली. रोमनसोबत पाच वर्षे आणि मैकीसोबत एक वर्ष डेटिंग केल्यानंतर 28 फेब्रुवारी रोजी तिघांनी थायलंडमधील प्राखोन चाई जिल्ह्यात लग्न केले. हा समारंभ कुटुंबीय आणि जवळच्या मित्रांच्या उपस्थितीत साधेपणाने पार पडला. हे लग्न स्थानिक थाई परंपरेनुसार पार पडले. या सोहळ्यानंतर दोन्ही वरांनी एकत्र तलावात उडी मारून आनंद साजरा केला. ऑस्ट्रियाच्या दोन्ही पुरुषांनी हुंडा म्हणून 10 लाख बात (सुमारे 29 लाख रुपये) दिले.
कुटुंबाने काय म्हटलं?
या लग्नाबाबत बोलताना वधूच्या आईने सांगितले की, आम्ही अनेक वर्षे मुलीच्या अडचणी पाहिल्या आहेत, आता माझी एकच इच्छा आहे की ती आनंदी राहावी आणि तिची चांगली काळजी घेतली जावी. समोर आलेल्या माहितीनुसार, दुआंगदुआन केत्सारो या महिलेल्या पहिल्या लग्नातून तीन मुले आहेत. लग्न करण्यापूर्वी दुआंगदुआनने आपल्या मुलांशी आणि आई-वडिलांशी मोकळेपणाने चर्चा केली होती.
नेटकरी काय म्हणाले?
या अनोख्या विवाहाचे फोटो समोर आल्यानंतर सोशल मीडियावर विविध प्रतिक्रिया उमटत आहेत. काही जण या नात्याला आधुनिक विचारसरणीचे उदाहरण मानत आहेत, तर काही जण याला सामाजिक परंपरांविरुद्ध केलेला विवाह मानत आहेत. अनेक युजर्सनी याला ‘फ्रीडम ऑफ लव्ह’ असं म्हटलं आहे.
