उपमुख्यमंत्री अजित पवार यांच्या अपघाती निधनानंतर त्यांचा अस्थिकलश नागपूर येथे दर्शनासाठी आणण्यात आला. राष्ट्रवादी काँग्रेसच्या दोन्ही गटातील नेत्यांनी यावेळी श्रद्धांजली अर्पण केली. राष्ट्रवादी काँग्रेस शरद पवार गटाचे नेते अनिल देशमुख यांनीही अस्थिकलशाचे दर्शन घेतले. यावेळी बोलताना देशमुख यांनी अजित पवारांच्या निधनासंदर्भात उपस्थित होत असलेल्या प्रश्नांवर प्रकाश टाकला.
देशमुख यांनी अनेक ज्येष्ठ नेत्यांनी व्यक्त केलेल्या शंकांचे समर्थन केले. छगन भुजबळ आणि संजय राऊत यांच्यासारख्या नेत्यांनी अपघाताच्या कारणांवर संशय व्यक्त केला आहे. कमी दृश्यमानता या अधिकृत कारणावर विश्वास बसत नाही, असे देशमुख यांनी नमूद केले. विमानाने दोन वेळा घिरट्या घातल्याचे सांगत, या अपघाताची हायकोर्ट न्यायाधीशांच्या नियंत्रणाखाली सखोल चौकशी व्हावी अशी मागणी देशमुख यांनी केली. संजय राऊत यांच्या मागणीला त्यांनी आपला पाठिंबा असल्याचे स्पष्ट केले. या चौकशीमुळेच लोकांसमोर सत्य परिस्थिती येईल, असे देशमुख म्हणाले.
