देशभरात होळी, रंगपंचमीचा उत्साह पहायला मिळतोय. अशातच सुट्ट्यांदरम्यान ओटीटीवर एखादा चांगला कंटेंट पहायची इच्छा होत असेल तर ‘नेटफ्लिक्स’वरील हा चित्रपट चांगला पर्याय आहे. या सायकोलॉजिकल थ्रिलरने सर्वांचं लक्ष वेधलं आहे. नेटफ्लिक्स या ओटीटी प्लॅटफॉर्मवर येताच तो पहिल्या क्रमाकांवर ट्रेंड होऊ लागला आहे. या चित्रपटाने रणवीर सिंहच्या ‘धुरंधर’ आणि ‘तेरे इश्क में’ यांसारख्या मोठ्या चित्रपटांनाही मागे टाकलं आहे. या चित्रपटात असं काय खास आहे आणि सर्वत्र त्याची इतकी चर्चा का होतेय, त्याबद्दल जाणून घेऊयात..
या चित्रपटाचं नाव ‘अक्युज्ड’ (Accused) असं आहे. ‘डॉक्टर जी’ फेम दिग्दर्शक अनुभूती कश्यपने पुन्हा एकदा सर्वांत हटके कहाणी प्रेक्षकांच्या भेटीला आणली आहे. ‘अक्युज्ड’मध्ये दोन महिलांची कथा दाखवण्यात आली आहे. यामध्ये गीतिकाची भूमिका अभिनेत्री कोंकना सेन शर्माने साकारली असून मीराच्या भूमिकेत ‘लापता लेडीज’ फेम अभिनेत्री प्रतिभा रांटा आहे. हे दोघं विवाहित लेस्बियन कपल आहेत. गीतिका ही यशस्वी डॉक्टर असून करिअरमध्ये ती खूप पुढे जात आहे आणि तिला लवकरच एक मोठी जबाबदारी मिळणार असते.
पहा ट्रेलर-
गीतिका आणि मीरा हे त्यांच्या वैयक्तिक आयुष्यात खुश असतात आणि एकेदिवशी ते एका बाळाला दत्तक घेण्याचा विचार करतात. ज्यादिवशी ते ही बातमी जवळच्या लोकांमध्ये जाहीर करतात, त्याच्या दुसऱ्याच दिवशी गीतिकाच्या आयुष्यात मोठा ट्विस्ट येतो. या कथेत मोठं वळण तेव्हा येतं, जेव्हा एक अनोळखी व्यक्ती गीतिकावर लैंगिक छळाचा आरोप करतो. बघता बघता ही बातमी वाऱ्याच्या वेगाने सर्वत्र पसरते. यामुळे रुग्णालयातील स्टार डॉक्टर गीतिकाला सक्तीच्या रजेवर पाठवलं जातं. त्यानंतर तिच्या नोकरीवरही गदा येते.
कायदा आणि सामाजिक गुंतागुंतीत अडकलेल्या मीराचं आई होण्याचं स्वप्न हळूहळू फक्त स्वप्नच बनून राहतं. या चित्रपटाची सर्वांत जमेची बाजू म्हणजे त्यातील कलाकार. कोंकना सेन शर्माने अत्यंत प्रभावीपणे तिची भूमिका साकारली आहे. तर प्रतिभानेही तिच्या दमदार अभिनयकौशल्याने कथेला आणखी मजबूती दिली. नाती आणि समाज यांच्यातील विचारांमधील फरक अत्यंत प्रभावीपणे यात मांडण्यात आलं आहे. या चित्रपटाचा क्लायमॅक्ससुद्धा विचारात पाडणार आहे.
