शिल्पा शेट्टी ही बॉलिवूडमधील एक यशस्वी अभिनेत्री आहे. तिला फिटनेस क्वीन म्हणूनही ओळखले जाते. शिल्पा शेट्टीने अलिकडेच आपल्या आयुष्यात घडलेला एक वेदनादायक प्रसंग सांगितला आहे. शिल्पाने सांगितले की 90 च्या दशकात एका चित्रपटाच्या शूटिंगदरम्यान ती जखमी झाली होती आणि तिची पाठ गंभीररीत्या भाजली होती. मात्र तरीही तिने काम सुरू ठेवले. शिल्पाने पुढे बोलताना हेही सांगितले की, मेहनतीमुळेच मला अनेक चित्रपटात काम करण्याची संधी मिळाली. कामाप्रती असलेल्या बांधिलकीमुळे मला दिग्दर्शक पसंती देत होते. टुमारो टुडे शो या यूट्यूब चॅनेल बोलताना शिल्पाने ही माहिती दिली आहे.
शिल्पा शेट्टी काय म्हणाली?
शिल्पा शेट्टीने सांगितले की, ‘मला नेहमी काम मिळाले कारण लोकांनी माझी मेहनत पाहिली होती. मी नेहमी काम पूर्ण करत असे आणि कोणत्याही परिस्थितीत सेटवर पोहोचत असे. एकदा शूटिंगदरम्यान माझी पाठ HMI लाईटमुळे भाजली होती. मला फ्रेममधून बाहेर पडायचे होते आणि मागे एक छोटी लाईट होती. माझी पाठ त्याला लागली, त्यामुळे पाठ भाजली गेली.
मी आयुष्यात खूप मेहनत घेतली
पुढे बोलताना शिल्पा म्हणले की, जेव्हा भाजते तेव्हा लगेच कळत नाही, मात्र थोड्या वेळाने वेदना जाणवतात. तरीही मी दुसऱ्या दिवशी पुन्हा कामावर गेले. त्या दिवशी मला एक खास कॉस्ट्यूम घालायचा होता, पण पाठ भाजल्यामुळे तो व्यवस्थित घालता येत नव्हता. त्यामुळे मी तो फक्त पुढूनच घातला आणि मागून सुई-दोऱ्याने शिवून घेतला, त्यामुळे चैन लावण्याची गरज पडली नाही. माझ्यामुळे कोणालाही नुकसान होऊ नये म्हणून मी माझ्या आयुष्यात खूप मेहनत घेतलेली आहे.
शिल्पा केडी द डेविल चित्रपटात झळकणार
दरम्यान, शिल्पा शेट्टीने आपल्या करिअरची सुरुवात शाहरुख खानच्या बाजीगर या 1993 मधील चित्रपटातून केली होती. ती गेल्या 32 वर्षांरासून सक्रीय असून सुमारे 60 चित्रपटांमध्ये काम केले आहे. यातील काही चित्रपट सुपरहिट ठरले आहेत. ती अलिकडेच रोहित शेट्टीच्या इंडियन पोलिस फोर्स या वेब सिरीजमध्ये झळकली होती. आता ती लवकरच संजय दत्त यांच्यासोबत केडी द डेविल या कन्नड चित्रपटात दिसणार आहे.
