होळीचा सण आला की जुनी-नवी गाणी, ढोल-ताशांचा आवाज आणि जोशपूर्ण डीजे यांचा माहोल रंगतो. काही गाणी अशी आहेत ज्यांशिवाय होळी पार्टी अपुरीच वाटते.
मात्र गेल्या काही वर्षांपासून एक खास गाणे प्रत्येक होळीला सर्वाधिक गाजत आहे. विशेष म्हणजे या गाण्याला यूट्यूबवर तब्बल 1 अब्ज (बिलियन) पेक्षा जास्त व्ह्यूज मिळाले आहेत.
आपण ज्या गाण्याबद्दल बोलत आहोत ते म्हणजे 2017 मधील ब्लॉकबस्टर चित्रपट 'बद्री की दुल्हनिया' मधील टायटल ट्रॅक ‘बद्री की दुल्हनिया’. या गाण्याने रिलीजपासूनच प्रेक्षकांची मने जिंकली आणि आजही प्रत्येक होळी पार्टीत हे गाणे हमखास वाजते.
या गाण्यात आलिया भट्ट आणि वरुण धवन यांनी जबरदस्त डान्स सादर केला आहे. रंगांनी भरलेला सेट, मॉडर्न अंदाजातील चित्रीकरण आणि जोशपूर्ण संगीत यामुळे हे गाणे पारंपरिक होळी गीतांपेक्षा वेगळे ठरते. रिलीज होऊन जवळपास 9 वर्षे उलटूनही या गाण्याची लोकप्रियता कमी झालेली नाही.
‘बद्री की दुल्हनिया’ हा एक रोमँटिक-कॉमेडी चित्रपट असून तो 10 मार्च 2017 रोजी प्रदर्शित झाला होता. या चित्रपटाचे दिग्दर्शन शशांक खेतान यांनी केले असून निर्मिती धर्मा प्रोडक्शंस यांनी केली.
सुमारे 39 कोटी रुपयांच्या बजेटमध्ये तयार झालेल्या या चित्रपटाने जगभरात 200 कोटी रुपयांहून अधिक कमाई केली होती.
