बॉलिवूडची सदाबहार अभिनेत्री रेखा यांचं आयुष्य खुल्या किताबाप्रमाणेच आहे. रेखा त्यांच्या आयुष्याबद्दल कायम मोकळेपणे बोलत आल्या आहेत आणि याच कारणामुळे त्यांच्या वैयक्तिक आयुष्याबद्दल सर्वकाही माहीत आहे, असं लोकांना वाटतं. परंतु यांच्या आयुष्यात अनेक रहस्य आहेत, ज्यांची चाहत्यांना कल्पनाही नाही. अत्यंत गजबजलेल्या मुंबई शहरात रेखा यांचा बंगला आहे. या बंगल्याच्या उंच भिंती फक्त सुरक्षेसाठीच नाही तर आत अनेक रहस्येदेखील दडलेली आहेत.
रेखा यांचा 'बसेरा' हा बंगला एखाद्या राजवाड्यापेक्षा कमी नाही. मुंबईतील सर्वांत पॉश अशा वांद्रे परिसरात हा बंगला आहे. या बंगल्याच्या चारही बाजूंना उंच भिंती बांधलेल्या आहेत, तर त्याचा गेटही अत्यंत भव्य आहे. एखाद्या चित्रपटात दाखवला जातो, तसा हा आलिशान बंगला आहे.
रेखा यांच्या या आलिशान बंगल्याची किंमत तब्बल 100 कोटी रुपये असल्याचं म्हटलं जातं. बॉलिवूड सेलिब्रिटींच्या घराचे फोटो आणि व्हिडीओ हल्ली सोशल मीडियावर सहज पहायला मिळत असले तरी रेखा यांचा बंगला त्यासाठी अपवाद आहे. रेखा यांचा बंगला आतून कसा दिसतो, हे फार कमी लोकांना माहीत आहे.
रेखा यांचा बंगला आतून प्रसिद्ध चित्रपट 'उमराव जान'च्या सेटसारखाच दिसतो, असं म्हटलं जातं. त्यांच्या घरातून समुद्राचं विहंगम दृश्य पहायला मिळतं. रेखा यांच्या बंगल्यात कोणालाच डोकावण्याची परवानगी नाही. रेखा स्वत: ज्यांना आमंत्रित करु इच्छितात, त्यांनाच आत प्रवेश करता येतो.
रेखा यांचं निसर्गावर खूप प्रेम आहे. त्यामुळे त्यांच्या बंगल्याच्या आत आणि आजूबाजूला रोपं, झाडं लावलेली आहेत. त्यांच्या घराबाहेर भगवान शंकर आणि देवी पार्वती यांच्या हातांचं एक चित्र पहायला मिळत. त्यावर ओम नम: शिवाय असंदेखील कोरलेलं आहे.
