मुंबई : राज्य सरकारने उपोषणकर्ते मनोज जरांगे पाटील यांच्या आंदोलनानंतर मराठा आरक्षणाच्या (Maratha) मागण्या मान्य करत हैदराबाद गॅझेटियरचा जीआर जारी केला आहे. त्यानुसार, मराठवाड्याच्या 5 जिल्ह्यातील मराठा समाजाला याचा फायदा होणार असून सातार गॅझेटियरचा देखील जीआर काढला जाणार आहे. त्यामुळे, ओबीसी समाज आक्रमक झाला असून ओबीसी नेते छगन भुजबळ यांच्या नेतृत्वात विविध ठिकाणी आंदोलने सुरू आहेत. विशेष म्हणजे, छगन भुजबळ यांनी स्पष्ट शब्दात आपली नाराजी व्यक्त केली असून या निर्णयाचे दूरगामी परिणाम होणार असल्याचे त्यांनी म्हटले. मुख्यमंत्र्‍यांनी मला आश्वास्त केलंय, पण मी आणि देवेंद्र हे सत्तेचं ताम्रपट घेऊन आलो नाहीत, असे म्हणत भुजबळांनी भविष्यातील चिंता व्यक्त केली आहे. एबीपी माझाच्या कार्यकारी संपादक सरिता कौशिक यांनी छगन भुजबळ (Chhagan Bhujbal) यांची मुलाखत घेतली. यावेळी त्यांनी मराठा आरक्षणावर भाष्य केलंय.
मी मुख्यमंत्र्‍यांना हे दाखवलं, उतरंड, वंशावळप्रमाणे कागद पुढे केला. हैदराबाद गॅझेटियरच्या खाली आता हे आलंय असं मी म्हटलं. त्यावर, मुख्यमंत्री फडणवीसांनी मला आश्वस्त केलंय, पण मी आणि देवेंद्रजी सत्तेचं ताम्रपट घेऊन जन्माला आलो नाहीत. हे आळवावरचं पाणी आहे, मंत्रिपद आणि हे, उद्या 10 वर्षांनी दुसरं कोणी येईल. पण, हे डॉक्युमेंट तर तसंच राहतात ना, असे म्हणत छगन भुजबळ यांनी भविष्यात या जीआरच्या आधारे ओबीसीवर अन्याय होऊ शकते, असे संकेत दिले आहेत. तसेच, एका तासामध्ये दोन-दोन जीआर निघाले. त्याच्यावर महाराष्ट्र शासनाच्या सचिवांची सही देखील आहे. पहिल्या जीआरवर मराठा समाजाच्या ‘पात्र’ व्यक्तींना म्हटले. जरांगेंनी ऑब्जेक्शन घेतले अन् पात्र शब्द काढायला सांगितला. त्यानंतर दुसरा जीआर काढला. त्यात पात्र शब्द काढला गेला. जर चुकीचं होत असेल तर मी कसं काय गप्प राहू शकतो? मी माझे मत मांडणार, असा इशारा राज्याचे अन्न, नागरी पुरवठा व ग्राहक संरक्षण मंत्री तथा ज्येष्ठ ओबीसी नेते छगन भुजबळ यांनी राज्य सरकारला दिला आहे.
भुजबळांची भेट घेणार – विखे पाटील
मराठा आरक्षणाबाबत मंत्री छगन भुजबळ यांचे काही प्रश्न असतील तर मी स्वतः त्यांची भेट घेईल अस जलसंपदा मंत्री आणि मराठा आरक्षण उपसमितीचे अध्यक्ष राधाकृष्ण विखे पाटील यांनी म्हटलं आहे. मराठा समाजाला हैदराबाद गॅझेटियर लागू करत आरक्षण दिलं आहे. त्यामुळे ओबीसीमध्ये घुसखोरी झल्याच मंत्री छगन भुजबळ यांनी म्हटलं. त्यावर विखे पाटील यांनी, छगन भुजबळांना भेटून स्पष्टीकरण देईल असं म्हटलं आहे. मराठा अरक्षणातील हैदराबाद गॅझेटियरच्या GR बाबतीत मंत्री छगन भुजबळ यांनी आपण कोर्टात आव्हान देणार असल्याचे म्हटले. त्यावर, भुजबळ असं काही करतील अस वाटत नाही, या GR बाबत भुजबळ यांच्या मानतील संभ्रम दूर करू, ओबीसी आरक्षणाबाबत मराठा समाजाने देखील कधी विरोध केला नाही, असेही राधाकृष्ण विखे पाटील यांनी म्हटलं आहे.
आणखी वाचा
