अमोल खुणेचा गंभीर आरोप Image Credit source: टीव्ही 9 मराठी
मराठा आरक्षण आंदोलक मनोज जरांगे पाटील यांच्याबद्दल अमोल खुणे याने खळबळजनक दावा केला आहे. अमोल खुणे हा मनोज जरांगे पाटील यांचा जुना सहकारी आहे, तसेच तो मनोज जरांगे पाटील घातपाताचा प्रयत्न प्रकरणतील संशयित आरोपी देखील आहे, नुकतीच त्याची जामिनावर सुटका झाली आहे, दरम्यान जामिनावर सुटका होताच त्याने जालना पोलीस अधीक्षकांची भेट घेतली आहे. मनोज जरांगे पाटील आणि माझी एसआयटी चौकशी आणि नार्को टेस्ट करावी, अशा मागणीचं निवेदन त्याने यावेळी पोलीस अधीक्षकांना दिलं आहे. तसेच मनोज जरांगे पाटील यांच्या आंदोलनातलं मला सगळं माहिती आहे, योग्य वेळी सर्व काही बाहेर काढणार असा इशाराही यावेळी खुणेने दिला आहे.
यावेळी प्रसारमाध्यमांशी बोलताना खुणेनं मोठा गौप्यस्फोट केला आहे. तुम्ही जर कोपर्डी प्रकरणातील आरोपीला मारलं नाही तर मी फाशी घेईल, असं मनोज जरांगे पाटील आम्हाला बोलले होते, त्यामुळेच आम्ही कोपर्डी प्रकरणातील आरोपीला मारलं असा आरोप यावेळी खुणे याने केला आहे. कोपर्डी प्रकरणात मी शिक्षा भोगलेली आहे, मनोज जरांगे यांनी शिक्ष भोगली नाही, असंही यावेळी खुणे याने म्हटलं आहे. दरम्यान खुणे याने केलेल्या या आरोपामुळे चर्चेला उधाण आलं आहे.
गुन्हा सिद्ध झाला तर मी शिक्षा भोगायला तयार, नाही सिद्ध झाला तर त्याचे परिणाम त्यांना भोगावे लागतील, असा इशाराही यावेळी खुणे याने मनोज जरांगे पाटील यांना दिला आहे. दरम्यान जालना पोलीस अधीक्षकांच्या भेटीवर बोलताना खुणे म्हणाला की, माझी मागणी एवढीच आहे की जे माझ्यावर आरोप लागले आहेत, मनोज जरांगे पाटील जे बोलत आहेत, या सर्व पार्श्वभूमीवर माझं इतकंच म्हणणं आहे, की आमच्या दोघांचीही नार्को टेस्ट करण्यात यावी, शिवाय जेवढ्या चौकश्या शक्य असतील तेवढ्या सर्व चौकश्या या प्रकरणात लावण्यात याव्यात. ईडी, सीबीआय, नार्को टेस्ट अशा सर्व चौकश्या कराव्यात असंही यावेळी खुणे याने म्हटलं आहे.
