Bigg Boss Marathi 6 : कलर्स मराठीवरील लोकप्रिय रिअॅलिटी शो ‘बिग बॉस मराठी सिझन 6’ सध्या प्रेक्षकांचे भरपूर मनोरंजन करत आहे. घरात रोज नवनवीन घडामोडी, मतभेद, भांडणं आणि भावनिक क्षण पाहायला मिळत आहेत. मात्र आजच्या भागात भांडणाऐवजी तन्वी आणि आयुष यांच्यातील शांत, प्रामाणिक आणि विचारपूर्ण चर्चा प्रेक्षकांचे लक्ष वेधून घेणार आहे.
घरातील वातावरण बहुतेक वेळा तणावपूर्ण असताना, आयुष आणि तन्वी यांच्यात झालेली ही गप्पांची मैफल वेगळीच ठरते. या चर्चेत आयुष दोघांच्या स्वभावातील फरक अतिशय हटके आणि मजेशीर पद्धतीने मांडताना दिसतो. चक्क जेवणातील पदार्थांची तुलना करून त्याने स्वतःचा आणि तन्वीचा स्वभाव स्पष्ट केला आहे.
‘मी ब्लँड, तू स्पायसी’ आयुषची अनोखी उपमा
या चर्चेदरम्यान तन्वी आपली भावना मोकळेपणाने व्यक्त करते. ती म्हणते की, ‘मी या बाबतीत खूप इमोशनल फुल आहे. मी जशी आहे, तसंच समोरच्याकडूनही अपेक्षा ठेवते. हे मला खूप लोकांनी समजावून सांगितलंय.’ यावर आयुष अतिशय शांतपणे आणि समजूतदारपणे उत्तर देतो. तो म्हणतो, पण प्रत्येक जण वेगळा असतो. आपण दोघंही एकमेकांच्या अगदी एक्स्ट्रीमली ऑपोझिट आहोत. तू माझ्याकडून थोड्या कमी अपेक्षा ठेव.
मात्र तन्वीला ते सहज मान्य होत नाही. ती स्पष्टपणे सांगते, मी तुला हेच करू शकत नाही. याच क्षणी आयुषने चर्चेला हलकंफुलकं आणि मजेशीर वळण दिलं. तो स्वतःला ‘ब्लँड’ तर तन्वीला ‘स्पायसी’ म्हणत म्हणाला, मी सामान्यतः एक ब्लँड माणूस आहे. तू एक स्पायसी डिश आहेस, ज्यात खूप फ्लेवर्स आहेत. मी म्हणजे व्हेज फ्राईड राइस आहे आणि तू ट्रिपल शेजवान मंचूरियन ग्रेव्ही आहेस त्यावर ऑम्लेट!
तन्वीचा मिश्कील प्रतिसाद
आयुषच्या या हटके तुलनेवर तन्वी गालातल्या गालात हसताना दिसते. ही तुलना केवळ मजेशीर नसून दोघांच्या स्वभावातील फरक अतिशय सोप्या भाषेत मांडणारी ठरते. भावनिक, व्यक्त होणारी तन्वी आणि शांत, कमी अपेक्षा ठेवणारा आयुष या दोन भिन्न स्वभावांची ही केमिस्ट्री प्रेक्षकांना नक्कीच भावणार आहे.
