वसई-विरारमधून फळांवर गटारीचे पाणी शिंपडून विक्री करण्याचा धक्कादायक प्रकार समोर आला आहे. विरार येथील ग्लोबल सिटी नाक्यावर एका फळविक्रेत्याकडून हा गंभीर प्रकार घडत असल्याचे एका स्थानिक व्यक्तीच्या निदर्शनास आले. स्थानिक व्यक्तीने जेव्हा जाब विचारला, तेव्हा फळविक्रेत्याने गटारीचे पाणी बीएमसीचे (बृहन्मुंबई महानगरपालिका) पाणी असल्याचा खोटा दावा केला.
व्हिडिओमध्ये, स्थानिक व्यक्ती फळविक्रेत्याला गटारीचे पाणी फळांवर का शिंपडत आहे, असे विचारताना दिसतो. फळविक्रेता मात्र हे पाणी पिऊन दाखवण्याची तयारी दर्शवतो आणि बीएमसीचे पाणी असल्याचे सांगत नागरिकांची दिशाभूल करण्याचा प्रयत्न करतो.
या प्रकारानंतर स्थानिक नागरिकांनी पोलीस आणि अन्न-औषध प्रशासनाशी संपर्क साधला. मात्र, सुरुवातीला दोन्ही प्रशासकीय विभागांकडून समाधानकारक प्रतिसाद मिळाला नाही, अशी माहिती आहे. चमकदार आणि ताजी दिसणारी फळे विकत घेताना ग्राहकांनी अधिक सावधगिरी बाळगण्याचे आवाहन टीव्ही9 मराठीने केले आहे.
