BMC Eknath Shinde Office : मुंबई महापालिकेची निवडणूक महायुतीने जिंकलेली आहे. या निवडणुकीत भाजपा सर्वात मोठा पक्ष ठरला आहे. येत्या 11 फेब्रुवारी रोजी मुंबईच्या महापौरपदाची निवड केली जाणार आहे. या पदासाठी भाजपाने रितू तावडे यांच्या नावाची घोषणा केली आहे. महायुतीत उपमहापौर हे एकनाथ शिंदे यांच्या शिवसेनेच्या वाट्याला आले आहे. शिंदे गटाकडून संजय वर्णी यांचे नाव उपमहापौरपदासाठी निवडण्यात आले आहे. महापौर आणि उपमहापौरपदाच्या निवडीनंतर आता मुंबईच्या विकासासाठी अनेक महायुती जोमात कामाला लागणार आहे. त्याआधी महापालिकेत प्रत्येक पक्षाला कार्यालयांचे वाटप केले जात आहे. एकनाथ शिंदे यांच्या शिवसेनेने मात्र देऊ केलेले कार्यालय नाकारले आहे. ऑफिसचे स्थान आणि त्या ऑफिसच्या दरवाजाची दिशा यामुळे शिंदे गटाने हे कार्यालय नाकारले आहे.
ऑफिस मिळाले, पण लगेच नाकारले
मिळालेल्या माहितीनुसार मुंबई महापालिका कार्यालयात शिंदे यांच्या शिवसेनेला नैऋत्य दिशेला द्वार असलेले कार्यालय देण्यात आले होते. परंतु या कार्यालयाबाबत शिंदे गटात वेगवेगळ्या चर्चा चालू झाल्या होत्या. वास्तूशास्त्रानुसार नैऋत्य दिशेला असलेले द्वार हे दुर्भाग्याचे लक्षण आहे, असे शिंदे गटात म्हटले जात होते. हे ऑफिस यापूर्वी काँग्रेसचे होते. सध्या काँग्रेसची मुंबईतील परिस्थिती दिवसेंदिवस बिकट होत आहे, असे मत शिवसेनेच्या नेत्यांचे आहे. त्यामळेच शिंदे गटाने देऊ केलेले हे कार्यालय नाकारण्यात आले असून ते पुन्हा एकदा काँग्रेस पक्षाला दिलेले आहे.
कोणत्या पक्षाला कोणते कार्यालय देण्यात आले?
आता ठाकरे आणि शिंदे यांची शिवसेना यांना विभागून एक कार्यालय देण्यात आले आहे. शिवसेनेचे जुने कार्यालय विभागून 30 टक्के भाग कार्यालय एकनाथ शिंदे यांच्या शिवसेनेला तर 70 टक्के कार्यायल हेठाकरे यांच्या शिवसेनेला देण्यात आले आहे. 2017 साली देण्यात आलेले कार्यालय पुन्हा एकदा भाजपालाच देण्यात आले आहे. कार्यालय क्र. 4 हे मनसेला तर कार्यालय क्र. 05 हे AIMIM पक्षाला देण्यात आले आहे. कार्यालय क्र. 07 काँग्रेसला तर कार्यालय क्र. 08 राष्ट्रवादी (अजित पवार) राष्ट्रवादी (शरद पवार), समाजवादी पार्टी एकत्रित या तिन्ही पक्षांना देण्यात आले आहे.
