मुंबईच्या महापौर म्हणून भाजपच्या रितू तावडे आणि उपमहापौर म्हणून शिवसेनेचे संजय घाडी यांचा कार्यभार आजपासून सुरु झाला आहे. मुंबई महापालिका आयुक्त भूषण गगराणी यांच्या हस्ते त्यांनी पदभार स्वीकारला. या शपथविधी सोहळ्याला मुख्यमंत्री देवेंद्र फडणवीस आणि उपमुख्यमंत्री एकनाथ शिंदेही उपस्थित होते.
मुख्यमंत्र्यांनी माध्यमांशी बोलताना रितू तावडे यांचे अभिनंदन केले आणि म्हटले की, “महापौर आणि उपमहापौरपदी आमच्या महायुतीचे सदस्य निवडले गेले आहेत. रितू तावडे ह्या अनुभवी आणि पारदर्शक नेत्या म्हणून ओळखल्या जातात. त्यांनी मागील काळात मुंबईकरांच्या समस्या सोडवण्यासाठी सक्रिय भूमिका घेतली आहे होती. संजय घाडी यांचा देखील अनुभव उपमहापौरपदी उपयुक्त ठरेल.” आमचा हा प्रयत्न असेल की हिंदुहृदयसम्राट बाळासाहेब ठाकरे यांच्या जन्मशताब्दी निमित्ताने त्यांना अपेक्षित अशा प्रकारचं प्रशासन या महानगरपालिकेच्या माध्यमातून आम्ही चालवू. आमचे महापौर, उपमहापौर आणि सगळे पदाधिकारी मिळून या महापालिकेला एक दिशा देतील. सामान्य मुंबईकरांची स्वप्न ते पूर्ण करतील. त्याला पूर्ण ताकद देण्याचं काम महायुतीचं सरकार करेल. मी आणि एकनाथ शिंदे पूर्ण ताकदीने त्यांच्या पाठिशी उभं राहू. आपण जी नवी मुंबई घडवत आहोत, त्यांच्या माध्यमातून गती देण्याचं काम करू, असं आश्वासन फडणवीस यांनी दिलं.
