उपमुख्यमंत्री एकनाथ शिंदे यांनी अजित पवारांच्या राजकीय प्रवासाचे आणि प्रशासकीय कौशल्याचे कौतुक केले आहे. शिंदे यांनी सांगितले की, दादा प्रत्येक बारीक-सारीक गोष्टींवर लक्ष ठेवत होते आणि कामाच्या गुणवत्तेशी कधीही तडजोड करत नव्हते. एखादे काम चुकीचे आढळल्यास ते अधिकाऱ्यांना किंवा संबंधितांना लगेच झापत असत. महायुती सरकारमधील ते केवळ एक मंत्री नसून, प्रशासकीय कौशल्याचे चालते-बोलते विद्यापीठ होते, असे शिंदे म्हणाले.
पवार हे शिस्त, वक्तशीरपणा आणि स्पष्टवक्तेपणाचे मूर्तिमंत उदाहरण आहेत. राजकारणात नव्याने येणाऱ्यांसाठी ते एक विद्यापीठ होते, असे उपमुख्यमंत्री शिंदे यांनी म्हटले. अजित पवारांचे काम पहाटेपासून सुरू होत असे आणि ते कायम सर्वसामान्यांच्या कामांना प्राधान्य देत असत. राजकीय जीवनातील अनेक उलथापालथींनंतरही त्यांचे नेतृत्व अधिक प्रगल्भ झाले, असे शिंदे यांनी नमूद केले.
