गुन्हे अन्वेषण विभागाने (सीआयडी) पत्रकार परिषदेत नुकत्याच घडलेल्या अजित पवारांच्या विमान अपघात प्रकरणाच्या तपासाची सद्यस्थिती स्पष्ट केली. सर्वोच्च न्यायालयाने नमूद केल्यानुसार, तपासाला कोणतीही निश्चित कालमर्यादा नसते. या प्रकरणात अनेक तपास यंत्रणा सहभागी असून, यात तज्ज्ञांची मते आणि डेटा संकलन आवश्यक आहे, असं सीआयडीचे अप्पर पोलीस महासंचालक सुनील रामानंद यांनी सांगितलं आहे.
सीआयडीने खात्री दिली की तपास योग्य दिशेने आणि वेगाने सुरु आहे. अपघातात घातपात किंवा गुन्हेगारी कृत्य असल्याच्या संभाव्यतेचा तपास सुरु असल्याचे त्यांनी सांगितले. सीआयडीने आतापर्यंत मोठ्या प्रमाणात पुरावे गोळा केले आहेत आणि उर्वरित पुरावे तसेच तांत्रिक अहवाल लवकरच प्राप्त होतील. एआयबी (Aircraft Accident Investigation Bureau) चा अहवाल या तपासात महत्त्वाचा ठरणार आहे. पुणे फॉरेन्सिक सायन्स लॅब आणि केंद्र सरकारच्या अनेक संस्थांकडूनही तपासात सहकार्य मिळत आहे.
