इराणमधील सत्तासंघर्षाला आता एक मोठे वळण लागले आहे. अमेरिका आणि इस्रायलच्या संयुक्त हवाई हल्ल्यात इराणचे सर्वोच्च नेते आयातुल्ला अली खामेनेई यांचा मृत्यू झाल्याची माहिती समोर आली आहे. या हल्ल्यात आयातुल्ला अली खामेनेई यांच्या परिवारातील सर्व सदस्यांचा मृत्यू झाल्याचा दावा करण्यात येत आहे. या ऐतिहासिक घटनेमुळे पश्चिम आशियातील राजकारण पूर्णपणे ढवळून निघाले आहे. या घटनेनंतर इराणमध्ये ४० दिवसांचा शोक जाहीर करण्यात आला आहे, अशी माहिती इराणच्या प्रेस टीव्हीने दिली आहे.
मिळालेल्या माहितीनुसार, इस्रायलने ऑपरेशन न्यू ऑर्डर अंतर्गत तेहरानमधील खामेनेई यांच्या अत्यंत सुरक्षित समजल्या जाणाऱ्या निवासस्थानाला टार्गेट केले. अमेरिकेचे राष्ट्राध्यक्ष डोनाल्ड ट्रम्प यांनी ट्रुथ सोशलवर सर्वात आधी आयातुल्ला अली खामेनेई यांचा मृत्यू झाल्याचा दावा केला होता. इराणी जनतेसाठी आपला देश परत मिळवण्याची ही सर्वात मोठी संधी आहे, असे डोनाल्ड ट्रम्प यांनी म्हटले आहे.
मोज्तबा खामेनेई हल्लातून बचावल्याचा दावा
इराणी माध्यमांच्या वृत्तानुसार, या भीषण हल्ल्यात केवळ अली खामेनेईच नाहीत, तर त्यांच्या कुटुंबातील इतर सदस्यही ठार झाले आहेत. यामध्ये खामेनेई यांची एक मुलगी, एक नातू, नात, सून आणि जावई यांचा समावेश असल्याचे सांगितले जात आहे. त्यांचे पुत्र मोज्तबा खामेनेई हे या हल्ल्यातून बचावले की नाही, याची अद्याप अधिकृत माहिती मिळालेली नाही. मात्र ते सुरक्षित असल्याचे दावे केले जात आहेत.
आयातुल्ला अली खामेनेई यांच्या कुटुंबातील प्रमुख सदस्य कोण?
इराणचे सर्वोच्च नेते आयातुल्ला अली खामेनेई यांचे कुटुंब अत्यंत मोठे आणि प्रभावशाली आहे. त्यांच्या कुटुंबातील प्रमुख सदस्य कोण, याची माहिती समोर आली आहे. आयातुल्ला अली खामेनेई यांचा परिवार खूप मोठा आहे. त्यांची पत्नी, चार मुले, तीन मुली आणि नातवंडं असा परिवार आहे. आयातुल्ला अली खामेनेई यांच्या पत्नीचे नाव मन्सुरे खजस्ते बागेरजादेह असून त्या सार्वजनिक जीवनापासून नेहमीच दूर राहिल्या आहेत. त्या एका व्यावसायिक कुटुंबातून येतात. त्यांना चार मुलं आहेत. मोज्तबा खामेनेई, मुस्तफा खामेनेई, मसूद खामेनेई, मेसम खामेनेई अशी या चौघांची नावे आहेत.
मोज्तबा खामेनेई हे खामेनेईंचे दुसरे चिरंजीव असून त्यांना त्यांच्या वडिलांचे उत्तराधिकारी मानले जाते. इराणच्या गुप्तचर यंत्रणांवर त्यांचे पूर्ण नियंत्रण आहे, असे म्हटले जाते. तसेच खामेनेईंना बुशरा, होदा आणि मेसम अशा तीन मुली आहेत. त्या अत्यंत खाजगी आयुष्य जगतात आणि राजकारणापासून दूर राहतात. आयातुल्ला अली खामेनेई यांना अनेक नातवंडे आहेत. त्यापैकी मोहम्मद बाघेर खामेनेई हे एका नातवाचे नाव असून आता झालेल्या हल्ल्यात त्याचा मृत्यू झाल्याचे वृत्त आहे.
आयातुल्ला अली खामेनेई यांची बहीण बदरी खामेनेई यांनी अनेकदा आपल्या भावाच्या धोरणांचा जाहीर निषेध केला आहे. तसेच त्यांना एक पुतण्या असून महमूद मोरादखानी हे सध्या पॅरिसमध्ये निर्वासित आहेत. ते खामेनेई राजवटीचे कट्टर विरोधक आहेत.
