कल्याणमधून एक अत्यंत धक्कादायक घटना समोर आली आहे. पत्नीचा खून करून थेट नाशिकच्या पोलीस ठाण्यात जाऊन “मी बायकोला मारून आलोय” अशी कबुली देणाऱ्या पतीमुळे पोलिसही काही काळ चक्रावून गेले. चारित्र्यावर संशय घेत पतीने पत्नीची हत्या केल्याची माहिती समोर आली आहे. विशेष म्हणजे हा प्रकार अल्पवयीन मुलासमोरच घडल्याचेही उघड झाले आहे. खडकपाडा पोलिसांनी अवघ्या चार तासांत आरोपीला अटक करत गुन्ह्याचा उलगडा केला आहे. अर्चना उर्फ बाली विशाल भुतकर (वय २५) असे मृत महिलेचे नाव असून तिचा पती विशाल साहेबराव भुतकर (वय ३०) याने हा खून केल्याचा आरोप आहे.
कल्याणमधील उंबर्डे परिसरात पत्नीची हत्या करून नाशिकला जाऊन स्वतःहून पोलिसांसमोर हजर झालेल्या पतीच्या कबुलीजबाबामुळे खळबळ उडाली आहे. अर्चना उर्फ बाली विशाल भुतकर (वय २५) असे मृत महिलेचे नाव आहे. तिचा पती विशाल साहेबराव भुतकर (वय ३०) याने हा खून केल्याचा आरोप आहे. मिळालेल्या माहितीनुसार, हे दाम्पत्य गेल्या दीड वर्षांपासून कौटुंबिक वादामुळे वेगवेगळे राहत होते. विशाल हा मोठ्या मुलासह नाशिकमध्ये राहत होता, तर अर्चना कल्याणमधील उंबर्डे गावातील केडीएमसी गार्डनजवळील कैलास कारभारी यांच्या चाळीत राहून घरकाम करून आपल्या पाच वर्षांच्या मुलीचे संगोपन करत होती.
नेमकं काय झालं?
दरम्यान, ११ मार्च रोजी विशाल नाशिकहून कल्याणमध्ये पत्नीला भेटण्यासाठी आला होता. पुन्हा एकत्र राहून संसार सुरू करण्यासाठी त्याने अर्चनाला विनंती केली. मात्र, अर्चनाने त्यास नकार दिल्याने दोघांमध्ये जोरदार वाद झाला. या वादातून संतप्त झालेल्या विशालने पत्नीवर चाकूने हल्ला करून तिची हत्या केल्याचे तपासात समोर आले आहे. हत्या केल्यानंतर विशाल नाशिकला पळून गेला आणि तेथील पोलीस ठाण्यात जाऊन “मी माझ्या बायकोला मारून आलो आहे” अशी कबुली दिली. यानंतर नाशिक पोलिसांनी तात्काळ कल्याणमधील खडकपाडा पोलीस ठाण्याशी संपर्क साधला.
पोलिसात तक्रार दाखल
खडकपाडा पोलिसांचे पथक उंबर्डे परिसरातील घटनास्थळी पोहोचले असता अर्चना भुतकर हिचा मृतदेह रक्ताच्या थारोळ्यात आढळून आला. मयताच्या नातेवाईकांनी तिची ओळख पटवली. या प्रकरणी मयताचा मामेभाऊ राजू सुभाष ढाले यांनी दिलेल्या तक्रारीवरून खडकपाडा पोलीस ठाण्यात हत्येचा गुन्हा दाखल झाला. पोलीस उपआयुक्त अतुल झेंडे यांच्या आदेशानुसार तपास पथक नाशिकला रवाना करण्यात आले. त्यानंतर पोलिसांनी विशाल भुतकर याला अटक केली. आरोपीकडून गुन्ह्यात वापरलेला चाकू, मोटारसायकल आणि मोबाईल असा मुद्देमाल जप्त करण्यात आला आहे. या प्रकरणातील सर्वात धक्कादायक बाब म्हणजे, नऊ वर्षांचा मुलगा हा या घटनेचा प्रत्यक्षदर्शी साक्षीदार असल्याचे तपासात समोर आले आहे.
