ओटीटीवर ट्रेंड होतोय चित्रपटImage Credit source: Youtube
एखाद्या चित्रपटाचा बजेट तगडा असला आणि त्यात एकापेक्षा एक दमदार कलाकार असले तरी बॉक्स ऑफिसवर त्या चित्रपटाला यश मिळेलच असं नाही. असे अनेक बिग बजेट चित्रपट थिएटरमध्ये फ्लॉप होतात. मग त्यात सुपरस्टार असला तरी कथेत दम नाही म्हणून प्रेक्षकांनी अशा चित्रपटांना नाकारलं आहे. अशी अनेक उदाहरणं आपल्यासमोर आहेत. असाच एक चित्रपट बॉक्स ऑफिसवर दणक्यात आपटला होता आणि त्यामुळे निर्मात्यांना मोठा फटका बसला होता. कारण त्यांनी या चित्रपटाच्या व्हीएफएक्स आणि सेट डिझाइनवर पाण्यासारखा पैसा वाहिला होता. परंतु आता ओटीटीने या चित्रपटाला थोड्याफार प्रमाणात दिलासा दिला आहे. या चित्रपटाचं नाव आहे ‘द राजा साब’. बाहुबली स्टार प्रभासची यात मुख्य भूमिका होती.
साऊथ सुपरस्टार प्रभासच्या या चित्रपटाला मोठ्या आशेने थिएटरमध्ये प्रदर्शित करण्यात आलं होतं. परंतु या हॉरर कॉमेडीला जेव्हा डिजिटल प्लॅटफॉर्मवर स्ट्रीम करण्यात आलं, तेव्हा प्रेक्षकांनी त्याला अपेक्षित असा प्रतिसाद द्यायला सुरुवात केली. या चित्रपटात प्रभाससोबतच संजय दत्त, निधी अग्रवाल, मालविका मोहनन आणि रिद्धी कुमार यांच्याही भूमिका आहेत. ‘द राजा साब’ हा एक रोमँटिक हॉरर कॉमेडी चित्रपट आहे. याची कथा राजू (प्रभास) नावाच्या एका तरुण आणि त्याच्या आजीभोवती फिरते. आजीला अल्झायमर असून ती त्यांच्या बेपत्ता पतीला (संजय दत्त) शोधून काढण्याचा हट्ट धरते. आजोबांचा शोध घेता घेता राजू एका रहस्यमयी बंगल्यापर्यंत पोहोचतो. इथूनच कथेत वळण येतं आणि त्यानंतर एकामागोमाग एक जबरदस्त ट्विस्ट पहायला मिळतात.
‘बाहुबली’नंतर प्रभासचा मोठा चाहतावर्ग देशभरात निर्माण झाला. फक्त दाक्षिणात्य चित्रपटसृष्टीतच नाही तर हिंदीतही त्याची लोकप्रियता वाढली होती. त्यामुळे प्रभासचा चित्रपट आणि बिग बजेट या गोष्टी प्रेक्षकांना थिएटरपर्यंत खेचून येईल, असं निर्मात्यांना वाटलं होतं. मात्र प्रत्यक्षात चित्र वेगळंच होतं.
या पॅन इंडिया चित्रपटाचं दिग्दर्शन मारूतीने केलं असून थिएटरनंतर त्याला ओटीटीवर स्ट्रीम करण्यात येत आहे. ओटीटीवर येताच हा चित्रपट रातोरात टॉप ट्रेंडिंगच्या यादीत पोहोचला. हा चित्रपट तुम्ही जियो हॉटस्टारवर पाहू शकता. या ओटीटी प्लॅटफॉर्मवर हा चित्रपट टॉप 10 मध्ये ट्रेंड होतोय.
