Pakistani Stars Reaction On Asha Bhosle Death: दिग्गज गायिका आशा भोसले यांच्या चाहत्यांची संख्या फक्त भारतात नाही तर, संपूर्ण जगभरात फार मोठी आहे. आशा भोसले यांनी अनेक भाषांमध्ये गाणी गाय चाहत्यांच्या मनावर आणि संगीतविश्वावर राज्य केलं. पण अचानक आशा भोसले यांच्या निधनाची बातमी समोर आली आणि सेलिब्रिटींसह चाहत्यांना देखील मोठा धक्का बसला. महत्त्वाचं म्हणजे फक्त भारतीय सेलिब्रिटींनीच नाही तर, पाकिस्ताना कलाकारांनी देखील आशा ताई यांच्या निधनावर हळहळ व्यक्त केली आहे.
अभिनेता अहसान खान सोशल मीडियावर पोस्ट करत म्हणाला, “एका युगाचा अंत झाला आहे.” अभिनेता अदनान सिद्दीकी म्हणाला, “अगदी शांत क्षणांनाही भावनांनी भरून टाकण्याची शक्ती त्यांच्यामध्ये होती. आज ती शांतता खूप जड वाटत आहे. तुम्ही आम्हाला दिलेल्या भावनांसाठी, निर्माण केलेल्या आठवणींसाठी आणि मागे सोडलेल्या जादूसाठी धन्यवाद. तुमचा आवाज नेहमीच ऐकू येईल, कुठे ना कुठे, कोणत्या ना कोणत्या रूपात.”
गायक शुझा हैदर म्हणाला, “जगातील महान व्यक्तींपैकी एक म्हणून त्यांचे नाव नेहमीच स्मरणात राहील. एका विशेष अध्यायाचा अंत झाला आहे.” गायक आणि अभिनेता अली जफर याने देखील दुःख व्यक्त करत म्हणाला, “एक प्रतिभावान कलाकार. एक अतुलनीय आवाज. आशा भोसलेजींचं कार्य पिढ्यानपिढ्या प्रेरणा देत राहील. असे आवाज काळाबरोबर पुसले जात नाहीत, तर काळाचाच एक भाग बनतात. त्यांच्या आत्म्यास शांती लाभो.”, सध्या पाकिस्ताना सेलिब्रिटींचे पोस्ट देखील सोशल मीडियावर व्हायरल होत आहेत.
आशा भोसले यांचं निधन
मुंबईतील ब्रीच कँडी रुग्णालयात उपचार सुरु असताना गायिका आशा भोसले यांचं निधन झालं. मल्टी ऑर्गन फेल्युअरमुळे आशाताईंचं निधन झालं, अशी माहिती डॉक्टरांनी दिली. 11 एप्रिल रोजी आशा भोसले यांना रुग्णालयात दाखल करण्यात आलं होतं. त्यानंतर 12 एप्रिल रोजी त्यांच्या निधनाची बातमी समोर आली.
कुटुंबियांनी दिलेल्या माहितीनुसार, 13 एप्रिल रोजी दुपारी 4 वाजता शिवाजी पार्क स्मशानभूमीत त्यांच्यावर शासकीय सन्मानाने अंत्यसंस्कार करण्यात येतील. त्यापूर्वी, सकाळी 11 ते दुपारी 3 या वेळेत त्यांच्या निवासस्थानी अंत्यदर्शन घेता येईल. आता त्यांच्या निवासस्थानाबाहेर चाहत्यांनी गर्दी करण्यास सुरुवात केली आहे.
