IPL 2026: एक योगायोग आणि आयपीएल जेतेपदासाठी राजस्थान रॉयल्सच्या नावाची चर्चा! कसं काय ते जाणून घ्याImage Credit source: Rajasthan Royals Twitter
आयपीएल 2026 स्पर्धेत राजस्थान रॉयल्स संघ चांगली कामगिरी करताना दिसत आहे. आतापर्यंत खेळलेल्या पाच पैकी चार सामन्यात विजय मिळवून गुणतालिकेत पहिलं स्थान गाठलं आहे. त्यामुळे राजस्थान रॉयल्सचा प्लेऑफचा प्रवास सध्या तरी सोपा दिसत आहे. आता उर्वरित 9 पैकी 4 सामन्यात विजय मिळवला की प्लेऑफचं तिकीट मिळेल. असं असताना राजस्थान रॉयल्स जेतेपद मिळवेल असं काही क्रीडाप्रेमी सोशल मीडियावर चर्चा करत आहेत. त्यामुळे अनेकांना आश्चर्याचा धक्का बसला आहे. साखळी फेरीचे सामने सुरू असताना आधीच कसं काही भाकीत वर्तवलं असा प्रश्न अनेकांना पडला आहे. पण हा एक योग असून त्या आधारावर राजस्थानचे चाहते अंदाज बांधत आहेत. 18 वर्षांपूर्वी राजस्थान रॉयल्सने पहिल्यांदा जेतेपदावर नाव कोरलं होतं. तसंच काहीसं आता घडताना दिसत आहे. चला जाणून घेऊयात तेव्हा आणि आता काय घडलं आणि काय साम्य आहे ते…
राजस्थान रॉयल्सचा पराभव आणि…
राजस्थान रॉयल्सने या स्पर्धेच्या सुरूवातीच्या चार सामन्यात विजयी चौकार मारला. पण पाचव्या सामन्यात सनरायझर्स हैदराबादकडून पराभवाचं तोंड पाहावं लागलं. 2008मध्ये पहिल्या पाच सामन्यात असंच झालं होतं. तेव्हा शेन वॉर्नच्या नेतृत्वात राजस्थान रॉयल्सने पहिल्या पाच सामन्यातील चार सामने जिंकले होते. तर एका सामन्यात पराभव झाला होता. आता पु्न्हा तसंच घडलं आहे आणि राजस्थान रॉयल्सच्या चाहत्यांना जेतेपदाची चर्चा करण्यासाठी निमित्त मिळालं आहे. त्यामुळे आता राजस्थान रॉयल्सचा पुढचा प्रवास कसा असेल याकडे लक्ष लागून आहे. मागच्या पर्वात दिल्ली कॅपिटल्सने अशीच सुरूवात केली होती आणि नंतर प्लेऑफमध्ये जागा मिळवण्यात अपयशी ठरले. त्यामुळे पुढच्या चार सामन्यात राजस्थानची स्थिती काय ते कळून येईल.
राजस्थान रॉयल्सची कामगिरी
राजस्थान रॉयल्सने पहिल्या सामन्यात चेन्नई सुपर किंग्सला 8 विकेटने, दुसऱ्या सामन्यात गुजरात टायटन्सला 6 धावांनी, मुंबई इंडियन्सला 27 धावांनी आणि आरसीबीला 6 विकेट राखून पराभूत केलं. तर सनरायझर्स हैदराबादविरुद्धचा साना 57 धावांनी गमावला. आता राजस्थान रॉयल्सचा पुढचा सामना 19 एप्रिलला कोलकात्याशी होणार आहे.
