नाशिक येथील टीसीएस कंपनीमधील धर्मांतर आणि लौंगिक शोषण प्रकरणातील मास्टरमांईड निदा खान ही गेल्या 42 दिवसांपासून फरार होती. या प्रकरणातील इतर आरोपींना पोलिसांनी अटक केलं आहे, ते सध्या तुरंगात आहेत. मात्र निदा खान ही पोलिसांना सातत्याने गुंगारा देत होती. अखेर तिला अटक करण्यात पोलिसांना यश आलं आहे. नाशिक गुन्हे शाखा आणि छत्रपती संभाजीनगर पोलिसांनी संयुक्त कारवाई करत तिला शहरातून अटक केलं. नारेगाव भागातून तिला अटक करण्यात आलं. दरम्यान निदा खान हिच्या अटकेनंतर आता या प्रकरणात धक्कादायक माहिती समोर येत आहे. एमआयएमचा नगरसेवक असलेल्या मतीन पटेल यानेच निदा खानला लपण्यास मदत केली होती. त्यानंतर पोलीस मतीन पटेल यांच्याच मदतीने निदा खानपर्यंत पोहोचले.
घटनेबाबत अधिक माहिती अशी की, एमआयएमचा नगरसेवक मतीन पटेल याच्या मदतीनेच पोलिसांनी निदा खानला अटक केली आहे. महानगरपालिका निवडणुकीदरम्यान मतीन पटेल याला पोलीस सुरक्षा देण्यात आली होती. माजी खासदार इम्तियाज जलील यांच्या वाहनावर हल्ला झाल्यानंतर मतीन पटेल याला पोलीस संरक्षण देण्यात आलं होतं. दरम्यान याच संदर्भात स्टेटमेंट घ्यायचं आहे, असा बनाव करून पोलिसांनी ही कारवाई केली आहे. स्टेटमेंट घ्यायचं म्हणून छत्रपती संभाजीनगर पोलिसांनी मतीन पटेल याला बोलावून घेतलं होत. सुरुवातीला पोलिसांनी जुन्या घटने संदर्भात त्याचं स्टेटमेंट घेतलं, त्यानंतर पोलिसांनी मुख्य कारवाईक केली. पोलिसांनी निदा खानसंदर्भात चौकशी केली असता सुरुवातीला मतीन पटेल याने पोलिसांना उडवा उडवीची उत्तरं दिली. मात्र त्यानंतर निदा खान तिचे आई – वडील, मावशी आणि तिचा भाऊ कौसर पार्क येथे असल्याची माहिती मतीन याने पोलिसांना दिली.
मतीन पटेल याने दिलेल्या माहितीवरून अखेर पोलिसांनी निदा खान हिला अटक केली आहे. दरम्यान हे प्रकरण समोर आल्यानंतर निदा खान हिने अटक पूर्ण जामीन मिळावा यासाठी नाशिक कोर्टात धाव घेतली होती, मात्र तिला अटक पूर्व जामीन नाकारण्यात आला होता. तेव्हापासून ती फरार होती.
