छत्रपती संभाजीनगरमध्ये एका 68 वर्षीय महिला डॉक्टरची तब्बल 9 लाख रुपयांची फसवणूक झाल्याचा धक्कादायक प्रकार समोर आला आहे. बनावट सही करून डॉक्टरांच्या बँक खात्यातून 9 लाख रुपये काढण्यात आल्याने परिसरात खळबळ उडाली आहे. या प्रकरणी पोलिसांनी एका महिलेसह अल्पवयीन मुलीला ताब्यात घेतलं असून फसवणुकीत आणखी कोणाचा सहभाग आहे का, याचा तपास सुरू आहे.
मिळालेल्या माहितीनुसार, आरोपींनी चेकवर बनावट सही करून संबंधित महिला डॉक्टरांच्या खात्यातून मोठी रक्कम काढली. हा प्रकार उघडकीस आल्यानंतर क्रांती चौक पोलिसांनी तातडीने तपास सुरू केला. तांत्रिक तपासाच्या आधारे पोलिसांनी संशयित महिलेला ताब्यात घेत तिच्या घराची झडती घेतली असता तब्बल 9 लाख रुपयांची रोकड जप्त करण्यात आली.
दरम्यान, या फसवणूक प्रकरणात संबंधित बँकेतील एखाद्या कर्मचाऱ्याचा सहभाग आहे का, याचाही तपास पोलीस करत आहेत. अल्पवयीन मुलीचाही या प्रकरणात वापर करण्यात आल्याचा संशय व्यक्त केला जात आहे. पोलिसांकडून सध्या संपूर्ण प्रकरणाचा सखोल तपास सुरू असून आणखी धक्कादायक माहिती समोर येण्याची शक्यता व्यक्त केली जात आहे.
