आयपीएल 2026 स्पर्धेनंतर आता भारतीय क्रिकेट चाहत्यांना टीम इंडियाच्या अफगाणिस्तान विरूद्धच्या एकमेव कसोटी सामन्याची प्रतिक्षा आहे. अफगाणिस्तान क्रिकेट टीम या कसोटी सामन्यासाठी भारत दौऱ्यावर येणार आहे. त्यानंतर उभयंसघात 3 सामन्यांच्या एकदिवसीय द्विपक्षीय मालिकेचा थरार रंगणार आहे. दोन्ही संघांकडून या 4 सामन्यांसाठी संघ जाहीर करण्यात आला आहे. एकमेव कसोटी सामना हा 6 जूनपासून न्यू चंडीगडमधील महाराजा यादवेंद्र सिंह आंतरराष्ट्रीय क्रिकेट स्टेडियममध्ये खेळवण्यात येणार आहे. शुबमन गिल भारतीय संघाचं नेतृत्व करणार आहे. त्याआधी टीम इंडियाच्या गोटातून मोठी बातमी समोर आली आहे.
निवड समितीने आकिब नबी याचा एकमेव कसोटी सामन्यासाठी टीम इंडियात बॅकअप म्हणून समावेश केला आहे. निवड समितीकडून कायम खबरदारी म्हणून मालिकांसह मोठ्या स्पर्धेसाठी बॅकअप खेळाडूंना संधी दिली जाते. दुखापतीमुळे मुख्य संघातील खेळाडूला बाहेर व्हावं लागल्यास बॅकअप म्हणून समावेश करण्यात आलेल्या क्रिकेटरला गरजेनुसार संधी देण्यात येते. ऐनवेळेस गैरसोय आणि गडबड होऊ नये या हेतूने बॅकअप खेळाडूंना संधी दिली जाते. त्यानुसार आकीबचा बॅकअप म्हणून समावेश करण्यात आला आहे. त्यामुळे आकीब आता टीम इंडियातील खेळाडूंना नेट्समध्ये बॉलिंग करताना दिसणार आहे.
आकीब नबीची उल्लेखनीय कामगिरी
आकीबला देशातंर्गत क्रिकेटमध्ये जबरदस्त कामगिरीनंतरही भारतीय संघात संधी न दिल्याने क्रिकेट चाहत्यांसह माजी खेळाडूंकडून तीव्र संताप व्यक्त करण्यात आला होता. तर गुरनूर ब्रार, मानव सुथार आणि हर्ष दुबे या गोलंदाजांना कसोटी संघात संधी दिल्याने या संतापात आणखी भर पडली. आकीबला देशांतर्गत क्रिकेटमधील उल्लेखनीय कामगिरीनंतरही संधी न मिळाल्याने माजी कर्णधार दिलीप वेंगसरकर यांनी संताप व्यक्त केला होता. देशांतर्गत क्रिकेट बंद करायला हवं, अशी संतापजनक प्रतिक्रिया वेंगसरकर यांनी दिली होती. त्यानंतर अखेर बॅकअप म्हणून आकीबचा समावेश करण्यात आला आहे. आकीबने गेल्या रणजी ट्रॉफी स्पर्धेत सर्वाधिक 60 विकेट्स घेऊन जम्मू-काश्मीरला चॅम्पियन करण्यात बहुमूल्य योगदान दिलं होतं.
आकीबची देशांतर्गत कारकीर्द
दरम्यान आकीबने फर्स्ट क्लास क्रिकेटमध्ये बॉलिंगसह बॅटिंगनेही जबरदस्त अशी कामगिरी करुन दाखवली आहे. आकीबने 41 सामन्यांत 156 विकेट्स घेतल्यात. तसेच 2 अर्धशतकंही झळकावली आहेत
अफगाणिस्तान विरूद्धच्या टेस्ट सीरिजसाठी टीम इंडिया : शुबमन गिल (कॅप्टन), यशस्वी जैस्वाल, केएल राहुल, साई सुदर्शन, वॉशिंग्टन सुंदर, कुलदीप यादव, मोहम्मद सिराज, प्रसिद्ध कृष्णा, मानव सुतार, ऋषभ पंत, देवदत्त पडीक्कल, नितीश कुमार रेड्डी, गुरनूर बरार, ध्रुव जुरेल आणि हर्ष दुबे.
