राज्याच्या राजकारणात मागील काही वर्षांमध्ये मोठ्या घडामोडी पहायला मिळाल्या आहेत. आधी शिवसेनेत फूट पडली होती, त्यानंतर राष्ट्रवादीचेही दोन तुकडे झाले. हे दोन्ही पक्ष भाजपसोबत सत्तेत सहभागी झाले होते. यानंतर मोठ्या प्रमाणात पक्षांतर पहायला मिळाले. महाविकास आघाडीतील अनेक नेत्यांनी महायुतीतील पक्षांमध्ये प्रवेश केला होता. अशातच आता गेल्या काही काळापासून ऑपरेशन टायगरची चर्चा सुरू आहे. शिवसेना उद्धव बाळासाहेब ठाकरे पक्षाचे अनेक खासदार एकनाथ शिंदे यांच्या शिवसेनेच्या संपर्कात असल्याचे बोलले जात आहे. अशातच आता एका खासदाराने महत्त्वाच्या बैठकीला दांडी मारल्याचे समोर आले आहे. याबाबत सविस्तर माहिती जाणून घेऊयात.
खासदार ओमराजे निंबाळकरांची बैठकीला दांडी
आज धाराशिवमध्ये शिवसेना उद्धव बाळासाहेब ठाकरे पक्षाच्या बैठकीचे आयोजन करण्यात आले होते. ऑपरेशन टायगरच्या चर्चा असताना या बैठकीला खासदार ओमराजे निंबाळकर अनुपस्थित असल्याचे समोर आले आहे. एकीकडे ठाकरे गटाचे 7 खासदार शिवसेना शिंदे गटाच्या वाटेवर असल्याच्या चर्चा दुसरीकडे खासदार ओमराजे निंबाळकर बैठकीला अनुपस्थित असल्याचे चर्चांना उधाण आले आहे.
काय म्हणाले अंबादास दानवे?
शिवसेना उद्धव बाळासाहेब पक्षाचे आमदार अंबादास दानवे यांच्या उपस्थितीत धाराशिव मध्ये प्रमुख पदाधिकाऱ्यांची बैठक आयोजित करण्यात आली होती. या बैठकीला खासदार ओमराजे निंबाळकर यांनी दांडी मारली. ओमराजे निंबाळकर बैठकीला गैरहजर का? असा प्रश्न विचारला असता काही काम असेल म्हणून ते आले नसतील, त्यांच्याच कार्यालयात बैठक होती असं म्हणत दानवेंनी बाजू सावरण्याचा प्रयत्न केला. अंबादास दानवे यांच्या उपस्थितीत बैठकीला आमदार कैलास पाटील, आमदार प्रवीण स्वामी यांच्यासह अनेक पदाधिकारी हजर होते. मात्र ओमराजे निंबाळकर अनुपस्थित असल्याने चर्चांना उधाण आले आहे.
ओमराजे शिंदेंच्या संपर्कात?
ओमराजे निंबाळकर हे 2019 साली शिवसेनेच्या तिकीटावर निवडून आले होते. शिवसेनेत फूट पडल्यानंतर त्यांनी एकनाथ शिंदेंसोबत न जाता उद्धव ठाकरे यांच्यासोबत राहण्याचा निर्णय घेतला. त्यानंतर 2024 लोकसभा निवडणूकीत त्यांनी शिवसेना उद्धव बाळासाहेब ठाकरे पक्षाकडून विजय मिळवला होता. मात्र गेल्या काही दिवसांपासून ठाकरेंचे 7 खासदार शिंदेंच्या संपर्कात असल्याचे बोलले जात आहे, त्यात ओमराजे निंबाळकर यांचा समावेश तर नाही ना? असा प्रश्न उपस्थित होत आहे.
