बीसीसीआयने भारत विरुद्ध इंग्लंड एकदिवसीय मालिकेसाठी भारतीय संघाची घोषणा केली आहे. विराट कोहली आणि जसप्रीत बुमराह यांचे संघात पुनरागमन झाले आहे. मात्र, 20 जून रोजी अफगाणिस्तानविरुद्धच्या एकदिवसीय सामन्यात शतक झळकावणाऱ्या यशस्वी जयस्वालला संघातून वगळण्यात आले आहे. इंग्लंडविरुद्धची एकदिवसीय मालिका 14 जुलैपासून सुरू होणार आहे. इंग्लंडविरुद्धच्या एकदिवसीय मालिकेत विराट कोहली खेळणार की नाही याकडे सर्वांचे लक्ष लागले होते. बीसीसीआयने त्याला संघात स्थान दिले आहे, परंतु त्याचा सहभाग त्याच्या तंदुरुस्तीवर अवलंबून असेल. वृत्तानुसार, विराटला 22 जून रोजी सेंटर ऑफ एक्सलन्समध्ये तंदुरुस्ती चाचणी द्यावी लागेल. आयपीएल 2026 च्या अंतिम सामन्यात त्याला हॅमस्ट्रिंगची दुखापत झाली होती, ज्यामुळे त्याला अफगाणिस्तानविरुद्धच्या एकदिवसीय मालिकेतून बाहेर पडावे लागले होते.
दरम्यान, जसप्रीत बुमराहचे तीन वर्षांनंतर एकदिवसीय संघात पुनरागमन झाले आहे. 2023 च्या विश्वचषक अंतिम सामन्यानंतर तो एकही एकदिवसीय सामना खेळलेला नाही. याचा अर्थ बुमराह तीन वर्षांनंतर 50 षटकांच्या सामन्यात खेळताना दिसणार आहे. इंग्लंडविरुद्धच्या एकदिवसीय मालिकेसाठी निवडलेल्या संघाबद्दलची सर्वात आश्चर्यकारक गोष्ट म्हणजे यशस्वी जयस्वालला वगळण्यात आले आहे. अफगाणिस्तानविरुद्ध शतक झळकावून 24 तास सुद्धा उलटलेले नाहीत. विराट कोहलीच्या दुखापतीनंतर यशस्वीचा संघात समावेश करण्यात आला होता. चेन्नईमध्ये खेळल्या गेलेल्या शेवटच्या एकदिवसीय सामन्यात त्याने 86 चेंडूंमध्ये 110 धावांची नाबाद खेळी केली होती.
अफगाणिस्तानविरुद्ध नुकत्याच संपन्न झालेल्या एकदिवसीय सामन्यांसाठीच्या संघात समाविष्ट असलेले यशस्वी जयस्वाल, हर्ष दुबे आणि प्रिन्स यादव हे तीन खेळाडू इंग्लंडला जाणार नाहीत. मोहम्मद सिराज आणि हार्दिक पांड्या यांचाही 15 सदस्यीय संघात समावेश नाही. मालिकेतील पहिला सामना 14 जुलै रोजी बर्मिंगहॅममध्ये, दुसरा सामना १६ जुलै रोजी कार्डिफमध्ये आणि अंतिम सामना 19 जुलै रोजी लंडनच्या लॉर्ड्सवर खेळला जाईल.
एकदिवसीय मालिकेसाठी भारतीय संघ
शुभमन गिल (कर्णधार), रोहित शर्मा, विराट कोहली, श्रेयस अय्यर, केएल राहुल, ईशान किशन, वॉशिंग्टन सुंदर, अक्षर पटेल, नितीश कुमार रेड्डी, कुलदीप यादव, जसप्रीत बुमराह, प्रसिद्ध कृष्णा, हर्षित राणा, अर्शदीप सिंग, गुरनूर ब्रार.
