22 Jun 2026 12:51 PM (IST)
17 वर्षानंतर हा निकाल आला, याविषयी मी समाधानी- मल्हार पाटील
महायुती म्हणून आम्ही काम करणार, अशी प्रतिक्रिया मल्हार पाटील यांनी दिली आहे. खासदार ओमराजे निंबाळकर यांच्या शिवसेनेतील प्रवेशानंतर आणि पवन राजे निंबाळकर हत्याकांडाच्या निकालानंतर त्यांनी ही प्रतिक्रिया दिली. “माझ्या आजोबाच्या विरोधात षडयंत्र रचण्यात आलं, हे कोर्टाने नमूद केलं आहे. मी न्यायालयाच्या निर्णयाशी अतिशय समाधानी आहे. हे सर्व कट माझ्या आजोबाच्या विरोधात रचण्यात आले हे लोकांसमोर आलं. 17 वर्षानंतर हा निकाल आला याविषयी समाधानी आहे,” असं ते म्हणाले. एकनाथ शिंदे आणि माझ्या कुटुंबाचे चांगले संबंध आहेत, असं म्हणत त्यांनी थेट ओमराजेंवर बोलणं टाळलं.
22 Jun 2026 12:36 PM (IST)
मिलिंद नार्वेकर यांच्यासोबत माझा कोणताही वाद नाही- भास्कर जाधव
मिलिंद नार्वेकर यांच्यासोबत माझा कोणताही वाद नाही. हॉर्न वाजवणारी गाडी राहुल नार्वेकरांची असल्याचं मला वाटलं. माझ्या डोक्यात राहुल नार्वेकर बसलेत. गाडीचा हॉर्न सातत्याने वाजवल्याने गोंधळ झाला. राहुल नार्वेकर समजून मी कोण नार्वेकर असं बोललो. मिलिंद नार्वेकर यांच्यासोबत माझे कोणतेही मतभेद नाहीत, असं भास्कर जाधव यांनी स्पष्ट केलं.
22 Jun 2026 12:22 PM (IST)
सरकार फसवी शेतकरी कर्जमाफी करतंय- आदित्य ठाकरे.
“भाजपला देशात दंगे आणि मतभेद निर्माण करता येतात. सरकार फक्त फसवी शेतकरी कर्जमाफी करतंय. निधी मिळत नाही म्हणून पळणारे स्वत:च्या निधीसाठी पळत आहेत. ओमराजे निंबाळकरांसोबत परिवार म्हणून उभे राहिले आहोत. खासदार फोडून गुलाम पक्षाला संविधान बदलायचं आहे. बंडखोरांनी राजीनामा देऊन निवडणूक लढवावी,” अशी टीका आदित्य ठाकरेंनी केली.
22 Jun 2026 12:13 PM (IST)
जळगाव विधान परिषद निवडणुकीतील महायुतीचे उमेदवार नंदकिशोर महाजन यांचा 582 मतांनी विजय
जळगाव विधान परिषद निवडणुकीतील महायुतीचे उमेदवार नंदकिशोर महाजन यांचा 582 मतांनी विजय झाला आहे. तर महाविकास आघाडीचे शिवसेना ठाकरे गटाचे उमेदवार शरद तायडे यांना फक्त 17 मतं मिळाली आहेत. अपक्ष उमेदवार अनिल चौधरी यांना 11 तर शिवसेना शिंदे गटाच्या बंडखोर रेश्मा काळे यांना केवळ 1 मत मिळालं आहे.
22 Jun 2026 11:58 AM (IST)
मला मतदान केलेल्या मतदारांचा मी मनापासून आभारी आहे – धैर्यशील कदम
“निकाल लागला आहे. सांगली-सातारा विधान परिषद निवडणुकीत पक्ष आणि मित्र पक्षांनी संधी दिली. मला मतदान केलेल्या मतदारांचा मी मनापासून आभारी आहे. उमेदवारी निश्चित करताना मुख्यमंत्री देवेंद्र फडणवीस यांनी विश्वास टाकला. महायुतीची कोणतीही मतं फुटली नाहीत, महायुती म्हणून असणारी मते मिळाली आहेत” असं सांगली-सातारा विधान परिषदेचे विजयी उमेदवार धैर्यशील कदम म्हणाले.
22 Jun 2026 11:46 AM (IST)
भाजप महायुतीच्या कार्यकर्त्यांचा विजयी जल्लोष
धाराशिव बीड लातूर विधानपरिषद निवडणुकीत बसवराज पाटील यांचा विक्रमी 721 मतांनी विजय झाला आहे. त्या निमित्त भाजप महायुतीच्या कार्यकर्त्यांकडून विजयी जल्लोष करण्यात येत आहे.
22 Jun 2026 11:30 AM (IST)
सोलापूर विधान परिषदेचे विजयी उमेदवार राजेंद्र राऊत यांना मुख्यमंत्र्यांचा फोन
सोलापूर विधान परिषदेचे विजयी उमेदवार राजेंद्र राऊत यांना मुख्यमंत्री देवेंद्र फडणवीस यांनी फोन करून दिल्या शुभेच्छा. सोलापूर विधान परिषदेचे महायुतीचे उमेदवार राजेंद्र राऊत यांचा दणदणीत विजय झाल्यानंतर मुख्यमंत्र्यांनी दिल्या शुभेच्छा. राजेंद्र राऊत यांना फोन करत विजयाच्या दिल्या शुभेच्छा. वसंत देशमुख यांचा दारुण पराभव केल्यानंतर मुख्यमंत्र्यांनी राजेंद्र राऊतांना दिल्या शुभेच्छा.
22 Jun 2026 11:12 AM (IST)
मी प्रचार थांबवला होता, पण कार्यकर्ते ऐकले नाहीत – गोकुळ गीते
मी प्रचार थांबवला होता. पण कार्यकर्ते ऐकले नाहीत. कार्यकर्त्यांना विचारल्याशिवाय निर्णय घेणार नाही असं नाशिकचे विजयी उमेदवार गोकुळ गीते यांनी म्हटलं आहे. त्यांनी महायुतीचे अधिकृत उमेदवार नरेंद्र दराडे यांचा पराभव केला.
22 Jun 2026 11:03 AM (IST)
नागेश पाटील आष्टीकर यांच्या बंडखोरीचा आपल्याला फायदाच – अमरनाथ राजूरकर
“माझ्या सर्व नेत्यांचे मी आभार मानतो. नांदेड जिल्ह्यातील दहाच्या दहा आमदारांनी घेतलेल्या मेहनतीचे फळ आहे. मला मुख्यमंत्री फडणवीस साहेबांचा शुभेच्छापर फोन आला होता. नागेश पाटील आष्टीकर यांच्या बंडखोरीचा आपल्याला फायदाच झाला. आष्टीकर यांनी बंड केल्याने मला महाविकास आघाडीची मते मिळाली” असं नांदेडचे महायुतीचे विजयी उमेदवार अमरनाथ राजूरकर म्हणाले.
22 Jun 2026 10:56 AM (IST)
मुंबई – विधान भवनाच्या पायऱ्यांवर विरोधकांचं आंदोलन
मुंबई – विधान भवनाच्या पायऱ्यांवर विरोधकांचं आंदोलन. मुख्यमंत्री, उपमुख्यमंत्र्यांसमोर विरोधकांची जोरदार घोषणाबाजी. सातबारा कोरा झालाच पाहिजे, अशी मागणी विरोधकांकडून करण्यात येत आहे.
22 Jun 2026 10:50 AM (IST)
नाशिकचा निकाल मला अपेक्षितच होता – शिंदे सेनेचे आमदार किशोर पाटलांच वक्तव्य
नाशिकचा निकाल मला अपेक्षितच होता असं वक्तव्य़ शिंदे सेनेचे आमदार किशोर पाटील यांनी केलं आहे. त्यामुळेच जळगाव विधान परिषदेसाठी दोन अपक्ष उमेदवार दिले होते. दोघेही अपक्ष उमेदवारांची उमेदवारी मागे घेण्यासाठी एकनाथ शिंदे यांनी सज्जड दम दिला. नाईलाजाने भारतीय जनता पार्टीचे काम करावे लागलं असं किशोर पाटील म्हणाले.
22 Jun 2026 10:37 AM (IST)
नाशिक – गोकुळ गीते यांचे विश्वासू नाना गामने यांना मंत्री उदय सामंत यांचा फोन
नाशिक – गोकुळ गीते यांचे विश्वासू नाना गामने यांना मंत्री उदय सामंत यांचा फोन. गोकळ गीते यांना शिवसेना पुरस्कृत करावे अशी मागणी केली . मंत्री उदय सामंत नाशिक मध्ये दाखल झाल्यानंतर गोकुळ गीते यांना भेटण्यासाठी घेऊन या अशी देखील विनंती केली.
22 Jun 2026 10:36 AM (IST)
हा निकाल आमच्यासाठी अतिशय धक्कादायक, दराडे यांच्या पराभवाची कारणं शोधू – गिरीश महाजन
हा निकाल आमच्यासाठी अतिशय धक्कादायक आहे. आम्ही नाशिकमध्ये खूप प्रयत्न केले. तरीही मतदारांनी आमच्या बाजूने कौल दिला नाही. आम्ही एकनाथ शिंदेंची लवकरच भेट घेणार आहोत. दराडे यांच्या पराभवाची कारणं शोधू – गिरीश महाजन
22 Jun 2026 10:23 AM (IST)
नाशिकमध्ये आम्ही गोकुळ गीतेंना मदत केली – संजय राऊत
नाशिकमध्ये भाजपच्या सर्व उमेदवारांनी गोकुळ गीतेंना मतं दिली. नाशिकमध्ये आम्ही गोकुळ गीतेंना मदत केली, आमचं मतदान आम्ही गीतेंकडे वळवलं – संजय राऊतांचा गौप्यस्फोट
22 Jun 2026 10:18 AM (IST)
सोलापूर विधान परिषद निवडणूक – भाजपचे राजेंद्र राऊत विजयी
सोलापूर विधान परिषद निवडणुकीत भाजपचे राजेंद्र राऊत विजयी झालेत. राजेंद्र राऊत यांना 483 मते तर राष्ट्रवादी शरद पवार गटाच्या वसंत देशमुख यांना 118 मतं मिळाली. राजेंद्र राऊत 365 हे मतांनी विजयी झाले. तर 13 मतं बाद झाली.
22 Jun 2026 10:13 AM (IST)
विधान परिषद निवडणूक – नागपूरमध्ये भाजप उमेदवार राजीव पोतदार विजयी
विधान परिषद निवडणूक – नागपूरमध्ये भाजप उमेदवार राजीव पोतदार यांचा विजय झाला आहे. काँग्रेसचे उमेदवार अतुल लोंढे झाले पराभूत. लोंढे यांना 130 मतं मिळाली.
22 Jun 2026 10:07 AM (IST)
अमरावती विधान परिषद निवडणूक – भाजपच्या प्रवीण पोटे यांचा विजय
अमरावती विधान परिषद निवडणूकीत भाजपच्या प्रवीण पोटे यांचा विजय झाला आहे. भाजपच्या प्रवीण पोटे यांना 390 मतं मिळाली, तर वंचित बहुजन आघाडीच्या निलेश विश्वकर्मांना 31 मतं, काँग्रेसच्या हर्षजित देशमुख यांना 0 मतं मिळाली.
22 Jun 2026 09:55 AM (IST)
महायुतीचे उमेदवार नरेंद्र दराडे यांची मुलगी भावूक…
महायुतीचे उमेदवार नरेंद्र दराडे यांची मुलगी निकालानंतर भावूक झाली. गोकुळ गीते यांनी आघाडी घेताच नरेंद्र दराडे आणि त्यांच्या कन्या मतमोजणी केंद्र सोडताना भावुक. सगळ्या नेत्यांनी विश्वासघात केला म्हणत प्रियंका दराडे काकड यांना अश्रू अनावर
22 Jun 2026 09:40 AM (IST)
महाविकास आघाडीचे उमेदवार शरद तायडे यांचा निवडणूक प्रक्रियेवर संशय
महाविकास आघाडीचे उमेदवार शरद तायडे यांनी पुन्हा एकदा निवडणूक प्रक्रियेवर संशय घेतला आहे. महायुतीच्या उमेदवाराकडे धनशक्ती होते आता कोणाचा विजय होतो ते पाहू- तायडे. मनात धाकधूक नाही परंतु निवडणूक बिनविरोध झाले नाही आम्हाला हा आनंद आहे. मॅजिक पेन म्हणत पुन्हा एकदा निवडणूक प्रक्रियेवर शरद तायडे यांनी संशय व्यक्त केला आहे. महायुतीच्या उमेदवाराने जर 100% विजयाचा दावा केला असेल तर मॅजिक पेनचा विषय असेलच:- तायडे
22 Jun 2026 09:30 AM (IST)
महायुतीचे उमेदवार नंदकिशोर महाजन यांनी निकालापूर्वी विजयाचा दावा
महायुतीचे उमेदवार नंदकिशोर महाजन यांनी निकालापूर्वी विजयाचा दावा केला आहे. महायुतीच्या बाजूने शंभर टक्के निकाल लागणार आहे मी सर्व मतदार बांधवांचे आभार मानतो. गेल्या वीस वर्षापासून मी भारतीय जनता पार्टी सोबत काम करतोय, मी पक्षाच्या विचारांशी बांधील आहे. मला 500 पेक्षा जास्त मतं मिळतील असा विश्वास नंदकिशोर महाजन यांनी व्यक्त केला आहे
22 Jun 2026 09:30 AM (IST)
गोकुळ गित्ते आघाडीवर
नाशिक विधान परिषदेच्या निवडणुकीत मोठा धक्का बसत आहे. थेट अपक्ष उमेदवार गोकुळ गित्ते आघाडीवर आहेत.
22 Jun 2026 09:23 AM (IST)
जळगाव विधान परिषदेत निवडणुकीत महायुतीचे उमेदवार नंदकिशोर महाजन 577 मतांनी विजयी
नंदकिशोर महाजन यांच्या विजयाच्या घोषणाची औपचारिकता बाकी. नागपूर आणि छत्रपती संभाजीनगरमध्ये महायुतीचे उमेदवार विजयी झाली आहेत.
22 Jun 2026 09:22 AM (IST)
विधान परिषद निवडणुकीचा पहिला निकाल हाती..
विधान परिषद निवडणुकीचा पहिला निकाल हाती आला असून भाजपाचा नागपूरचा पहिला उमेदवार विजयी झाला आहे.
22 Jun 2026 09:20 AM (IST)
मतमोजणी केंद्रात विद्यमान आमदार उपस्थित असल्याचा गोकुळ गीतेंनी घेतला होता आक्षेप
महायुतीचे उमेदवार नरेंद्र दराडे यांचे बंधू शिक्षक आमदार किशोर दराडे यांच्या उपस्थितीला गीते यांनी घेतला होता आक्षेप. निवडणूक निर्णय अधिकाऱ्यांसमोर झालेल्या सुनावणीत गीते यांच्या आक्षेपाचं करण्यात आलं निरसन. मतमोजणीच्या प्रक्रियेला सुरुवात
22 Jun 2026 09:10 AM (IST)
दुपारी ३ वाजता सर्व ६ खासदार अधिकृतपणे शिवसेनेमध्ये प्रवेश करणार
त्याच्याआधी, साधारण ११ वाजता ते याबद्दलचं ऑफिशियल लेटर आणि फोटो जाहीर करतील. या सर्व खासदारांचं वेळापत्रक असं असेल: दुपारी १ वाजता ते कलिना एअरपोर्टवर लँड होतील, त्यानंतर २ वाजता त्यांची एक मीटिंग होईल आणि शेवटी दुपारी ४ वाजता ते मीडियासोबत प्रेस कॉन्फरन्स घेतील.
22 Jun 2026 09:05 AM (IST)
बीड जिल्ह्यातील एकूण प्रकल्पांमध्ये केवळ 17% पाणी साठा उपलब्ध.
बीड जिल्ह्यात 143 मध्यम आणि लघु प्रकल्प आहेत. यापैकी 14 प्रकल्प कोरडेठाक पडले आहेत. तर जिल्ह्यातील 79 प्रकल्पात मृतसाठा उपलब्ध. जून महिना संपत आला तरीही पाऊस नसल्याने शेतकऱ्यांची चिंता वाढली.
22 Jun 2026 08:57 AM (IST)
वसई-विरार शहरात मेघगर्जनेसह जोरदार पावसाला सुरुवा
सकाळपासूनच अधूनमधून पाऊस पडत असल्याने वातावरणात गारवा निर्माण झाला असून संपूर्ण परिसर ढगाळ वातावरणाने व्यापला आहे. पालघर जिल्ह्यासाठी आज यलो अलर्ट जारी करण्यात आला असून त्याच पार्श्वभूमीवर सकाळपासूनच पावसाने हजेरी लावण्यास सुरुवात केली आहे. रिमझिम पडत असलेल्या वातावरणामुळे शेतकरी वर्गात आनंदाचे वातावरण निर्माण झाले आहे. तर खरीप हंगामाच्या तयारीला वेग येण्याची अपेक्षा व्यक्त केली जात आहे.
22 Jun 2026 08:50 AM (IST)
खेड तालुक्यातील पिंपरी खुर्दमध्ये विद्युत रोहित्र चोरी, गावचा पाणीपुरवठा ठप्प
पुणे जिल्ह्यातील खेड तालुक्यातील पिंपरी खुर्द गावात विद्युत रोहित्र (डीपी) चोरी झाल्याने संपूर्ण गावाचा पाणीपुरवठा ठप्प झाला आहे. चोरट्यांनी रोहित्रातील ऑईल आणि तारा लांबविल्यामुळे जलजीवन मिशनच्या पाणीपुरवठा योजनेवर परिणाम झाला असून ग्रामस्थांसमोर पिण्याच्या पाण्याचा गंभीर प्रश्न निर्माण झाला आहे. आठवडाभरात दुसऱ्यांदा झालेल्या चोरीच्या घटनेमुळे ग्रामस्थांमध्ये संतापाचे वातावरण असून चोरट्यांचा तातडीने बंदोबस्त करण्याची मागणी जोर धरत आहे. दरम्यान, पाणीपुरवठा पूर्ववत करण्यासाठी महावितरणने तात्काळ नवीन रोहित्र बसवावे, अशी मागणी ग्रामस्थांनी केली आहे.
22 Jun 2026 08:40 AM (IST)
कल्याण नगर महामार्गावर भीषण अपघात; ट्रकची दुचाकीला जोरदार धडक
कल्याण नगर महामार्गावर भीषण अपघात झाला आहे. ट्रकने दुचाकीला जोरदार धडक दिली आहे. अपघाताचा थरार सीसीटीव्ही कॅमेरात कैद झाला असून अपघातात बाप लेकीचा जागीच मृत्यू झाला आहे. मृतांमध्ये एक पुरुष, पाच वर्षीय चिमुकलीचा समावेश आहे. दोन मुले आणि एक महिला गंभीर जखमी असून जखमींवर खासगी रुग्णालयात उपचार सुरू आहे.
22 Jun 2026 08:30 AM (IST)
जळगाव विधान परिषद निवडणुकीसाठी आज मतमोजणीची प्रक्रिया पार पडणार
जळगावातील जिल्हाधिकारी कार्यालयातील अल्पबचत भवन येथे मतमोजणीसाठी प्रशासन सज्ज झालं आहे. पोलिसांचा मोठा बंदोबस्त या ठिकाणी मतमोजणीच्या आवारात तैनात करण्यात आला आहे. शिवसेना शिंदे गटाकडून बंडखोरी तसेच मतदानाच्या पूर्वसंध्येला अपक्ष उमेदवाराचे माघार यामुळे जळगावच्या निवडणुकीत राज्यात चर्चेचा विषय बनली होती. महायुतीचे भाजपचे उमेदवार नंदकिशोर महाजन व महाविकास आघाडीचे ठाकरे गटाचे शरद तायडे यांच्यात थेट लढत पार पडली. उमेदवारांच्या भाग्याचा फैसला आज होणार असून निकालाकडे जिल्ह्याचे लक्ष लागला आहे.
22 Jun 2026 08:25 AM (IST)
सांगली-सातारा विधान परिषदे निवडणुकीत भाजपचे पारडे जड
सांगली सातारा विधान परिषदेच्या निवडणुकीची मतमोजणी आज पार पडणार आहे.सांगली येथील तरुण भारत क्रीडांगण येथे मतमोजणी होणार आहे. सकाळी आठ वाजल्यापासून मतमोजणीची प्रक्रिया सुरू होणार असून ही निवडणूक दुरंगी झाल्याचे चित्र स्पष्ट झालेले आहे. महायुती भाजपकडून धैर्यशील कदम तर महाआघाडीकडून अभयसिंह जगताप या दोघांमध्ये लढत खऱ्या अर्थाने झाली आहे. 99.89% इतके मतदान झाले असून सांगली खानापूर विटा तालुक्यातील एका मतदाराने गैरहजेरी लावले होते. त्यामुळे 895 पैकी 894 इतके मतदान झाले आहे. सकाळी आठ वाजल्या पासून मतमोजणी सुरु होणार असून जय आणि पराजय कोणाचा हे 11 वाजे पर्यंत चित्र स्पष्ट होईल. यंदाच्या निवडणुकीमध्ये महायुतीचे उमेदवार धैर्यशील कदम यांना अवघड वाटणारे निवडणूक शेवटच्या टप्प्यात महायुतीने एक दिलाने लढल्याने थोडीशी सोपी झाल्याचे दिसून आले आहे.पण अंडर करंट असू शकतो अशीही चर्चा मतदारांमध्ये होती.या निवडणुकीमध्ये प्रचार सभा नसून गुप्त बैठका व सेटिंग यावर दोन्ही गटाकडून जोर लावण्यात आला होता आज या विधान परिषदेचा आमदार कोण होणार ते चित्र स्पष्ट होणार आहे
22 Jun 2026 08:24 AM (IST)
धाराशिव बीड लातूर विधान परिषद निवडणुकीचा आज निकाल
विधान परिषदेच्या उस्मानाबाद- लातूर-बीड स्थानिक प्राधिकारी मतदारसंघाच्या निवडणुकीची मतमोजणी आज पार पडत आहे सकाळी ८ वाजता सुरू होणार आहे.ही मतमोजणी भाई उद्धवराव पाटील शासकीय औद्योगिक प्रशिक्षण संस्था (आयटीआय) धाराशिव येथे होणार असून प्रशासनाने आवश्यक सर्व तयारी पूर्ण केली आहे. या पार्श्वभूमीवर मोठा पोलीस बंदोबस्त ठेवण्यात आला आहे महायुतीचे उमेदवार बसवराज पाटील तर महाविकास आघाडीचे उमेदवार महेश देशमुख यांच्यामध्ये झाली होती लढत थोड्याच वेळात निकाल हाती येणार
22 Jun 2026 08:22 AM (IST)
शिरूर तालुक्यातील गंभीर गुन्ह्यांतील सराईत गुन्हेगार एमपीडीए अंतर्गत स्थानबद्ध
शिक्रापूर पोलीस ठाणे हद्दीतील औद्योगिकीकरण वाढत असताना गुन्हेगारीला आळा घालण्यासाठी पुणे ग्रामीण पोलिसांनी मोठी कारवाई केली आहे. खुनाचा प्रयत्न, खंडणी, अग्निशस्त्रासह हल्ला असे गंभीर गुन्हे करणाऱ्या सराईत गुन्हेगाराला महाराष्ट्र धोकादायक व्यक्ती प्रतिबंधक कायदा MPDDA अंतर्गत स्थानबद्ध करून नागपूर मध्यवर्ती कारागृहात पाठवले आहे. गणेश भाऊसाहेब फडतरे, वय 35, रा. फडतरेवस्ती, कोरेगाव भीमा, ता. शिरूर, जि. पुणे असे स्थानबद्ध करण्यात आलेल्या इसमाचे नाव आहे.
22 Jun 2026 08:20 AM (IST)
मुंबई-उपनगरात मान्सूनची हजेरी, कांदिवली ते गोरेगाव पावसाची बॅटिंग
मुंबईकरांची प्रतीक्षा संपली. अखेर मान्सूनने मुंबईसह उपनगरात हजेरी लावली आहे. कांदिवली, मालाड, बोरिवली, गोरेगावसह सर्वच भागांत पावसाला सुरुवात झाली आहे. गेल्या 15 मिनिटांपासून मुंबईच्या उपनगरात पाऊस सुरू आहे. कांदिवली, मालाड, बोरिवली, गोरेगाव परिसरात पाऊस सुरू आहेत. मान्सूनच्या आगमनाने मुंबईकरांना उकाड्यापासून दिलासा मिळाला आहे.
22 Jun 2026 08:10 AM (IST)
विधान परिषद निवडणुकीच्या मतमोजणी पूर्वीच भाजपाचे उमेदवार प्रवीण पोटे यांच्या विजयाच्या अभिनंदनाचे लागले बॅनर
अमरावतीत विधान परिषद निवडणुकीच्या मतमोजणी पूर्वीच भाजपाचे उमेदवार प्रवीण पोटे यांच्या विजयाच्या अभिनंदनाचे बॅनर लागले आहेत. अमरावतीच्या गर्ल्स हायस्कूल चौकात प्रवीण पोटे यांच्या समर्थकांनी विजयाचे बॅनर लावले. जिल्ह्याचे विकास पुरुष विधान परिषदमध्ये भरघोस मतांनी निवडून आल्याबद्दल प्रवीण पोटे पाटील यांचे अभिनंदन असा उल्लेख बॅनरवर केला आहे.
22 Jun 2026 08:05 AM (IST)
दादरमध्ये पावसाची दमदार हजेरी; उकाड्यापासून नागरिकांना दिलासा
मुंबईत आज सकाळपासूनच हवामानात अचानक बदल झाला असून, दादर आणि आसपासच्या परिसरात ढगाळ वातावरणात पावसाला सुरुवात झाली आहे. या पहिल्यावहिल्या दमदार सरींमुळे वातावरणात छान गारवा निर्माण झाला आहे. गेल्या काही दिवसांपासून प्रचंड उकाड्याने हैराण झालेल्या सामान्य नागरिकांना यामुळे मोठा दिलासा मिळाला आहे.
