मुंबईतील चेंबूर परिसरातून एक धक्कादायक अपघाताची घटना समोर आली आहे. चेंबूरमधील 11 नंबर रोडवर एका शाळेच्या बसवर अचानक भलेमोठे झाड कोसळल्याने मोठी दुर्घटना घडली. या अपघातात अनेक विद्यार्थी जखमी झाले असून किमान 10 मुलांना दुखापत झाल्याची प्राथमिक माहिती समोर आली आहे.
घटनेनंतर परिसरात एकच खळबळ उडाली. झाड थेट बसवर कोसळल्यामुळे बसचे मोठे नुकसान झाले असून काही विद्यार्थी बसमध्ये अडकून पडले होते. स्थानिक नागरिक आणि बचाव पथकांनी तातडीने घटनास्थळी धाव घेत मदतकार्य सुरू केले.
प्राथमिक माहितीनुसार, बसमधील जखमी विद्यार्थ्यांना बाहेर काढून तातडीने जवळच्या रुग्णालयात उपचारासाठी दाखल करण्यात आले आहे. दरम्यान, एका विद्यार्थ्याचा बसमध्ये अडकलेला असल्याची माहिती उपमहापौर संजय घाडी यांनी दिली असून त्याला सुरक्षित बाहेर काढण्यासाठी युद्धपातळीवर प्रयत्न सुरू आहेत.
घटनेनंतर अग्निशमन दल, महानगरपालिका आणि इतर आपत्कालीन यंत्रणा घटनास्थळी दाखल झाल्या असून बसवरील झाड हटवण्याचे काम सुरू आहे. ही बस कोणत्या शाळेची होती, बसमध्ये एकूण किती विद्यार्थी होते आणि अपघाताचे नेमके कारण काय, याबाबत अद्याप अधिकृत माहिती समोर आलेली नाही.
सध्या प्रशासनाकडून संपूर्ण घटनेची चौकशी सुरू असून बचावकार्याला प्राधान्य देण्यात आले आहे. या घटनेमुळे परिसरात चिंतेचे वातावरण निर्माण झाले आहे.
