पिंपरी-चिंचवडमधील मोशी परिसरात कचरा डेपोच्या जवळ एक इमारत कोसळल्याची गंभीर घटना समोर आली आहे. प्राथमिक माहितीनुसार, या दुर्घटनेत इमारतीच्या ढिगाऱ्याखाली सुमारे १४ जण अडकल्याची भीती व्यक्त करण्यात येत असून, घटनास्थळी युद्धपातळीवर बचावकार्य सुरू करण्यात आले आहे.
घटनेची माहिती मिळताच अग्निशमन दल, एनडीआरएफ (NDRF), पोलीस प्रशासन आणि आपत्कालीन पथके तातडीने घटनास्थळी दाखल झाली आहेत. ढिगाऱ्याखाली अडकलेल्या नागरिकांचा शोध घेण्यासाठी बचावकार्य वेगाने सुरू असून, परिसरात मोठ्या प्रमाणात यंत्रणा तैनात करण्यात आली आहे.
दरम्यान, परिसरात सुरू असलेल्या मुसळधार पावसामुळे बचावकार्यात अडथळे निर्माण होत आहेत. इमारतीच्या मागील बाजूस कचरा डेपो असल्याने मोठ्या प्रमाणात कचरा ढिगाऱ्यावर पसरला असून, जेसीबीच्या साहाय्याने कचरा हटवण्याचे काम सुरू आहे, जेणेकरून अडकलेल्यांपर्यंत बचाव पथकांना लवकर पोहोचता येईल.
घटनेनंतर परिसरात नागरिकांची मोठी गर्दी झाली असून, पोलिसांकडून सुरक्षिततेच्या दृष्टीने परिसराला घेराव घालण्यात आला आहे. अद्याप कोणतीही अधिकृत जीवितहानीची माहिती समोर आलेली नसून, बचावकार्य पूर्ण झाल्यानंतरच दुर्घटनेचे नेमके कारण आणि नुकसान स्पष्ट होणार आहे.
