Anil Parab On Yogesh Kadam: राज्याचे गृहराज्यमंत्री योगेश कदम (Yogesh Kadam) यांची अडचण वाढली असताना ॲार्केस्ट्रा परवाना परत करून फक्त रेस्टोबार आणि हॉटेल परवाना ठेवला असल्याची माहिती मिळाली आहे. कदम यांनी सावली बार (Savli Bar Mumbai) ज्या व्यक्तीस चालवण्यास दिला त्यासोबतचा करारनामा अगोदरच रद्द केला आहे. यानंतर आता गृहराज्यमंत्री योगेश कदमांच्या आईच्या नावाने असणाऱ्या सावली बारमधील ऑर्केस्ट्रा परवाना परत केल्याची माहिती समोर आली आहे. सदर प्रकरणी आता ठाकरे गटाचे नेते अनिल परब (Anil Parab) यांनी हल्लाबोल केला आहे.
चोरीचा माल परत केला म्हणजे गुन्ह्यातून सुटता येत नाही. परवाना परत केला म्हणजे डान्स बारमध्ये अवैध्य काम सुरु होतं हे मान्य केलं, असं अनिल परब म्हणाले. तसेच आधी सांगत होते केवळ ऑर्केस्ट्रा चालतो. या परवान्यावर डान्स बार चालवला गेला. अजून तपास सुरू आहे, गुन्हा घडला आहे, असं अनिल परब यांनी सांगितले. याआधी देखील सावली बारवर कारवाई झाली आहे.
लाडकी बहीण म्हणायचं आणि दुसरीकडे आया बहिणींना नाचवायचं- अनिल परब
एकीकडे लाडकी बहीण म्हणायचं आणि दुसरीकडे आया बहिणींना नाचवायचं. गृहराज्यमंत्रीचं कायदा व सुव्यवस्था पायदळी तुडवत असल्याची टीका अनिल परब यांनी केली. मला मुख्यमंत्री देवेंद्र फडणवीस यांची दया येत आहे. त्यांना सदर प्रकरणाबाबतची मी सगळी कागदपत्र दिली आहेत, असंही अनिल परबांनी सांगितले.
अनिल परब यांनी देवेंद्र फडणवीसांना सगळे पुरावे दिले-
अनिल परब यांनी 29 जुलै रोजी मंत्रालयात मुख्यमंत्री देवेंद्र फडणवीस यांची भेट घेऊन गृहराज्यमंत्री योगेश कदम यांच्यावरी गंभीर आरोपांचे दस्तऐवजी पुरावे अधिकृतपणे सुपूर्द करण्यात आले. सादर केलेल्या पुराव्यांमध्ये पोलिस पंचनामे, व्हिडीओ क्लिप्स, दस्तऐवज आणि अन्य तांत्रिक माहितीचा समावेश असल्याचं अनिल परब यांनी सांगितले. तसेच या भेटीत संबंधित प्रकरणाची गंभीरता अधोरेखित करत कार्यवाहीची मागणी अनिल परब यांनी केली.
अनिल परब यांचा नेमका आरोप काय?
विधानपरिषदेत अंतिम आठवडा प्रस्तावावर अनिल परब यांनी विधानसभेत हा आरोप केला. अनिल परब म्हणाले की, कांदिवली येथे सावली बार आहे. इथे पोलिसांनी धाड टाकली. त्यावेळी 22 बारबाला पकडल्या गेल्या. 22 बारबाला 22 कस्टमर आणि 4 कर्मचाऱ्यांना पकडण्यात आले. या ठिकाणी कस्टमरवर गुन्हा दाखल झाला. या ठिकाणी पोलिसांनी पंचनामा केला. त्या बारचे परमिट हे ज्योती रामदास कदम यांच्या नावे आहे. त्या गृहमंत्र्यांच्या मातोश्री आहेत, असे अनिल परब यांनी म्हटले. एकीकडे लाडक्या बहिणीचा तुम्हाला आशीर्वाद आहे आणि दुसरीकडे तुम्ही आया बहिणींना डान्सबारमध्ये नाचवता?, असं म्हणत गृहराज्यमंत्री यांचा राजीनामा घ्यावा, अशी मागणीही अनिल परब यांनी केली होती.
अनिल परब यांची संपूर्ण पत्रकार परिषद, VIDEO:
संबंधित बातमी:
आणखी वाचा
