बांग्लादेशच्या 13 व्या सार्वत्रिक निवडणुकीत तारिक रहमान यांच्या नेतृत्वाखाली बांग्लादेश नॅशनलिस्ट पार्टीने (BNP) शानदार प्रदर्शन केलं. पूर्ण बहुमत मिळवून त्यांनी सत्तेत पुनरागमन केलय. माजी पंतप्रधान शेख हसीना यांच्या पक्षावर अवामी लीगवर प्रतिबंध असल्याने ते निवडणुकीत सहभागी होऊ शकले नाहीत. त्यामुळे BNP साठी निवडणूक सोपी झाली होती. कट्टरपंथी विचारधारा असलेल्या जमात-ए-इस्लामी पार्टी आघाडीकडून कडवी लढत मिळेल अशी अपेक्षा होती. मतमोजणीला सुरुवात झाल्यानंतर प्रारंभीच्या कलांमध्ये बांग्लादेश नॅशनलिस्ट पार्टीने आघाडी घेतली. शेवट पर्यंत ही आघाडी त्यांनी टिकवून ठेवली. या निवडणुकीत जमातच्या आघाडीला मोठा फटका बसला. आपण या निवडणुकीत मोठा उलटफेर घडवून आणू असं जमातला वाटलं होतं. पण तसं काही घडलं नाही. जमातला 70 च्या आसपास जागा मिळाल्या. निवडणूक आयोगाने या निवडणूक निकालांसंदर्भात अजून औपचारिक घोषणा केलेली नाही.
जमात-ए-इस्लामी मुख्य विरोधी पक्ष ठरला आहे. जमातचे प्रमुख नेते डॉक्टर शफीक़ुर रहमान यांना प्रमुख विरोधी पक्ष नेत्याची भूमिका निभवावी लागणार आहे. त्यांच्या आघाडीला 70 च्या आसापास जागा मिळतायत. जमातच्या नेतृत्वाखालील आघाडीला सध्या 68 जागा मिळाल्या आहेत. विद्यार्थी आंदोलनातून निर्माण झालेल्या नॅशनल सिटिजन पार्टीचा त्यांना 6 जागा मिळाल्याचा दावा आहे. हा निकाल पाकिस्तानसाठी सणसणीत चपराक आहे. बांग्लादेशच्या जनतेने जो कौल दिला त्यातून सर्वकाही स्पष्ट आहे. त्यांनी कट्टरपंथी विचारधारेला सत्तापद नाकारलय. पाकिस्तानचं जमात-ए-इस्लामी सारख्या पक्षांना समर्थन आहे. कारण बांग्लादेशला कट्टरतावादाकडे नेऊन आपली पोळी भाजण्याचा पाकिस्तानचा प्रयत्न होता.
ही भारताच्या दृष्टीने चांगली बाब
बांग्लादेशात सध्या मोठ्या प्रमाणात हिंदू विरोध सुरु आहे. हिंदुंच्या तिथे हत्या सुरु आहेत. पाकिस्तानला असेच कट्टरपंथी विचारधारेचे पक्ष तिथे सत्तेवर हवे होते. पण बांग्लादेशच्या जनतेने निकालातून स्पष्टपणे आपला विचार मांडला आहे. BNP सोबत भारतातल्या राजकीय पक्षांचं फार सख्य नाहीय. पण ते जमात इतके कट्टरपंथी नाहीत. ही भारताच्या दृष्टीने चांगली बाब आहे.
बांग्लादेशी संसदेत एकूण किती जागा?
बांग्लादेशच्या संसदेत एकूण 300 जागा आहेत. त्यातल्या 278 जागांचे निकाल लागले आहेत. बीएनपीच्या नेतृत्वाखालील आघाडीला 203 जागा मिळाल्या आहेत. जमातच्या आघाडीला 68 जागा आणि इस्लामी आंदोलन बांग्लादेशला 1 जागा आणि अन्य पक्षांना 6 जागा मिळाल्या आहेत. अजून 21 जागांचे निकाल येणं बाकी आहे. बांग्लादेशात निवडणुकीआधी जमात-ए-इस्लामीने देशभरात आपल्याबाजूने माहौल बनवला होता. पण निकाल त्यांच्या बाजूने लागला नाही. कधी जमात-ए-इस्लामी बीएनपीचा जवळचा मित्र पक्ष होता.
