मुंबई, दि. ७ नोव्हेंबर २०२५ : राज्यातील १० वर्षे व त्यापेक्षा जास्त सेवा पूर्ण केलेल्या कंत्राटी कर्मचा-यांच्या नियमित समायोजनाबाबत शासनाने महत्त्वपूर्ण निर्णय घेतला आहे.
मंत्रीमंडळाच्या दि. ०४ नोव्हेंबर २०२५ रोजी झालेल्या बैठकीत या संदर्भात मंजुरी देण्यात आली असून, त्यानुसार खालीलप्रमाणे कार्यवाही करण्यास मान्यता देण्यात आली आहे :
1️⃣ सेवा समायोजन: दिनांक १४ मार्च २०२४ रोजी १० वर्षे सेवा पूर्ण झालेल्या कंत्राटी कर्मचा-यांचे समकक्ष पदांवर सेवा समायोजन करण्यात येईल. हे समायोजन नियमित सेवाप्रवेश नियमात दुरुस्ती न करता एक वेळच्या विशेष बाब म्हणून करण्यात येणार आहे.
2️⃣ वयाची अट शिथिल: सेवा समायोजनासाठी कर्मचा-यांच्या सेवा कालावधी इतकी वयाची अट शिथिल करण्यात येईल.
3️⃣ वेतन निश्चिती: समायोजनानंतर संबंधित कर्मचा-यांचे वेतन हे त्यांच्या मागील महिन्यातील मानधनापेक्षा पुढील टप्प्यावर निश्चित करण्यात येईल.
4️⃣ शैक्षणिक अर्हतेचे पालन: केंद्र शासनाने वेळोवेळी दिलेल्या शैक्षणिक अर्हतेसंबंधी सुचनांचे काटेकोर पालन करूनच सेवा समायोजन करण्यात येईल.
5️⃣ आंतरविभागीय समिती स्थापन: कंत्राटी कर्मचा-यांच्या नियमित समायोजनासाठी निकष ठरविण्यासाठी मा. मुख्य सचिव यांच्या अध्यक्षतेखाली आंतरविभागीय समिती स्थापन करण्यात येणार आहे.
