Mumbai News: दादर रेल्वे स्थानकावर (Dadar Railway Station) टॉयलेट शोधताना लंडनहून आलेल्या 66 वर्षीय ‘एनआरआय’ महिलेचा अपघातात दुर्दैवी मृत्यू झाला. एक्स्प्रेसमधून उतरताना तोल गेल्याने महिला ट्रेन अन् प्लॅटफॉर्ममधील फटीत अडकून गंभीर जखमी झाली होती. महिलेला उपचारासाठी रुग्णालयात दाखल करण्यात आले होते. मात्र उपचारादरम्यान महिलेचा मृत्यू झाला आहे.
याबाबत अधिक माहिती अशी की, लंडनमध्ये राहणारे बादशाह शेख आणि त्यांची पत्नी काही दिवसांपूर्वी मुंबईत आले होते. अंबरनाथहून लोकलने दादरमध्ये उतरलेले हे दाम्पत्य विमानतळाकडे जाण्यासाठी दुसरी लोकल पकडणार होते. मात्र, 27 नोव्हेंबर रोजी दुपारी सुमारे 2.23 वाजता प्लॅटफॉर्म क्रमांक 10 वर शौचालय न सापडल्याने महिलेने मुलासह तिथे उभी असलेल्या मेल एक्सप्रेसच्या शौचालयाचा वापर करण्याचा निर्णय घेतला.
Mumbai News: उपचारादरम्यान महिलेचा मृत्यू
दरम्यान, महिला एक्सप्रेसमध्ये असतानाच गाडी सुटली. गाडी हळूवार पुढे सरकू लागल्यावर महिलेने चालत्या ट्रेनमधून खाली उतरायचा प्रयत्न केला आणि त्याच क्षणी तिचा तोल गेला. ती प्लॅटफॉर्म आणि ट्रेनच्या मधील फटीत कोसळली. रेल्वे कर्मचाऱ्यांनी आणि उपस्थित प्रवाशांनी तत्काळ महिलेची सुटका करून तिला सायन रुग्णालयात दाखल केले. परंतु उपचारादरम्यान तिचा मृत्यू झाला. दादर रेल्वे पोलिसांनी या प्रकरणी अपमृत्यूची नोंद केली आहे.
Mumbai News: लंडनहून भारतात नातेवाईकांना आले होते भेटायला
मृत महिलेचे पती बादशाह शेख आणि त्यांचे कुटुंब मूळचे हैदराबादचे आहेत. अनेक वर्षांपूर्वी हे दाम्पत्य अंबरनाथमध्ये मासेमारी व्यवसायासाठी फिरस्ती करत असे. रोजगाराच्या शोधात त्यांनी दुबई गाठले आणि त्यानंतर लंडनमध्ये स्थायिक झाले. गेल्या 30 वर्षांपासून संपूर्ण कुटुंब लंडनमध्ये राहत असून दर काही वर्षांनी मुंबई व बेंगळुरू येथील नातेवाईकांना भेट देण्यासाठी भारतात येतात. दरम्यान, महिलेचा मृतदेह अंतिम संस्कारासाठी हैदराबादला पाठवण्यात आला आहे. या घटनेमुळे शेख कुटुंबीयांवर दुखा:चा डोंगर कोसळला आहे.
Thane News: लखनऊमध्ये अडचणीत सापडलेल्या ठाण्याच्या विद्यार्थ्यांची सुटका
दरम्यान, ठाण्यातील डॉ. बेडेकर महाविद्यालयातील सातवी, आठवी आणि नववीमधील विद्यार्थ्यांचा स्काऊट-गाईड कॅम्पसाठी लखनऊ दौरा ठरला होता. या कॅम्पला 15 विद्यार्थी आणि दोन शिक्षक सहभागी झाले होते. मात्र परतीच्या प्रवासादरम्यान विद्यार्थ्यांना मोठ्या अडचणींचा सामना करावा लागला. लखनऊहून सुटणारी पुष्पक एक्सप्रेस सुटल्याने विद्यार्थ्यांना तिथेच थांबावे लागले. यानंतर परतीसाठी त्यांनी एका खाजगी बस ट्रॅव्हल्सशी संपर्क साधला. परंतु धक्कादायक बाब म्हणजे बस चालकाने विद्यार्थ्यांना मध्यरस्त्यात उतरण्यास सांगून बस तिथून निघून गेली. अचानक परक्या शहरात मुले व शिक्षक असुरक्षित परिस्थितीत अडकले. या प्रकरणाची माहिती मिळताच पालकांनी तातडीने राष्ट्रवादी (शरद पवार गट) चे आमदार जितेंद्र आव्हाड यांच्याशी संपर्क साधला. आव्हाड यांनी तत्काळ लखनऊ येथील समाजवादी पक्षाच्या स्थानिक पदाधिकाऱ्यांशी संपर्क साधून विद्यार्थ्यांना सुरक्षित ठिकाणी हलवण्याची व्यवस्था केली. सध्या सर्व विद्यार्थ्यांना एका सुरक्षित आश्रमात नेण्यात आले असून, त्यांना ठाण्याकडे रवाना करण्याची व्यवस्था सुरू आहे.
आणखी वाचा
आणखी वाचा
