Mumbai Police On Mumbai Ganesh Visarjan मुंबई: महाराष्ट्रासह मुंबईत उद्या (6 सप्टेंबर) लाडक्या बाप्पाला (Ganesh Utsav 2025) निरोप देण्यात येणार आहे. दक्षिण मुंबईतील चौपाटीवर गणपती बाप्पाच्या विसर्जनासाठी मोठ्या प्रमाणात नागरिक येत असतात. दरम्यान मुंबईतील गणपती विसर्जनासाठी मुंबई पोलीस (Mumbai Police) सज्ज झाले आहेत. आज सह पोलीस आयुक्त (कायदा आणि सुव्यवस्था) सत्यनारायण चौधरी आणि सह पोलीस आयुक्त (वाहतूक) अनिल कुंभारे यांनी पत्रकार परिषद घेत गणपती विसर्जनाबाबत माहिती दिली.
मुंबईमध्ये गणपती विसर्जनाच्या वेळी वाहतूक आणि कायदा व सुव्यवस्था राखण्यासाठी मुंबई पोलीस सज्ज आहेत. दरवर्षीप्रमाणे यंदाही मोठ्या संख्येने पोलीस अधिकारी, कर्मचारी आणि वाहतूक पोलिसांची तैनात केली जाणार आहे. याशिवाय, सीसीटीव्ही कॅमेरे, ड्रोन व इतर तंत्रज्ञानाचा वापर करून विसर्जन मिरवणुकींवर आणि गर्दीवर बारीक लक्ष ठेवले जाणार आहे. सुरक्षेसाठी विशेष नाकेबंदी, नियंत्रण कक्ष आणि आपत्कालीन पथके तयार करण्यात आली आहे.
पहिल्यांदाच मुंबई पोलिसांकडून बंदोबस्तात एआयचा वापर-
विसर्जनाची पूर्ण तयारी मुंबई पोलिसांना केली आहे. रस्ते, चौपाटी, वाहतूकीची सगळी तयारी पूर्ण झालेली आहे. घरगुती गणेश विसर्जन, मंडळातील मोठ्या गणपती मूर्तीच्या विसर्जनाची तयारी पूर्ण झाली असून चौपाटीच्या ठिकाणी बीएसमी, स्वयंसेवक असतील. प्रत्येक ठिकाणी कडेकोट बंदोबस्ताचं नियोजन केलंय, अशी माहिती मुंबई पोलिसांनी दिली. मुंबईत 10 हजार कॅमेरे लावण्यात आले आहेत. ड्रोनद्वारे देखील सगळ्या विसर्जनावर नजर ठेवण्यात येणार आहे. पोलिसांच्या पेट्रोलिंगच्या गाड्या असतील. कंट्रोल रुम देखील सज्ज आहे. पोलिसांनी दिलेल्या सगळ्या सूचनाचं पालन करा, असं आवाहन मुंबई पोलिसांकडून करण्यात आले आहे. तसेच यंदा पहिल्यांदाच मुंबई पोलिसांकडून बंदोबस्तात एआयचा वापर करण्यात येणार असल्याची माहिती देखील मुंबई पोलिसांनी पत्रकार परिषदेत दिली.
सह पोलीस (आयुक्त कायदा व सुव्यवस्था) सत्यनारायण चौधरी काय म्हणाले?
गणेशोत्सव राज्य महोत्सव म्हणून घोषित करण्यात आला आहे. महापालिकेसोबत मिळून आम्ही बंदोबस्त आखला आहे. 6500 सार्वजनिक गणेशोत्सव मंडळ आहेत. दीड ते दोन लाख घरगुती गणपती मुंबईत आहेत. 65 नैसर्गिक विसर्जन स्थळ आहे. 205 कृत्रिम तलाव आहेत. तसेच विसर्जन मार्गावरील रस्ते मोकळे करण्यात आले आहेत. सीसीटीव्ही कॅमेऱ्यातून मुंबईवर लक्ष ठेवलं जाईल. 12 अतिरिक्त पोलीस आयुक्त, 40 डीसीपी, 61 एसीपी यावेळी बंदोबस्तात तैनात असतील. सोबत 3000 अधिकारी आणि 18,000 पोलीस कर्मचारी देखील तैनात असतील. सोबत राज्य राखीव पोलीस दलाच्या 14 तुकड्या, चार शीघ्र कृती दलाच्या तुकड्या तीन दंगल नियंत्रण पथकाच्या तुकड्या, आणि BDDS ला देखील सज्ज ठेवण्यात आले आहेत. 10000 सीसीटीव्ही कॅमेरातून विसर्जनावर लक्ष ठेवलं जाईल. तसेच ड्रोन कॅमेऱ्याने नजर ठेवली जाईल. AI चा देखील मुंबई पोलीस बंदोबस्तकरीता वापर केला जाणार आहे. परवानगी शिवाय ड्रोन उडवण्यास बंदी असणार आहे. सध्या वेशातील पोलीस देखील तैनात असतील. दहशतवाद विरोधी उपाययोजना देखील घेण्यात आल्या आहेत
सह पोलीस आयुक्त (वाहतूक) अनिल कुंभारे काय म्हणाले?
वाहतुकीसाठी नियोजन करण्यात आलं आहे. गिरगाव चौपाटी तसेच दादर चौपाटी,जुहू येथे वाहतूकव्यवस्थेत बदल करण्यात आले आहेत. बंदोबस्तासाठी 4 पोलीस उपायुक्त तसेच 2826 वाहतूक पोलीस कर्मचारी तसेच महाराष्ट्र सुरक्षा दलाचे जवान रस्त्यावर असतील. सामाजिक संस्थाच देखील सहकार्य घेतलं जाणार आहे. तसेच टप्प्याटप्प्याने रुग्णवाहिका तैनात करण्यात आले आहेत. तसेच मुंबईत 12 पूल धोकादायक आहेत सावधगिरीच आवाहन करण्यात आलं आहे. गर्दीची 52 ठिकाण ओळखण्यात आली असून वाहतूक नियमनासाठी टॉवर उभारण्यात आले आहेत. तसेच 520 सुरक्षा रक्षक समुद्रकिनारी तैनात करण्यात आले असून कोस्टगार्डची देखील मदत घेण्यात आली आहे.
आणखी वाचा
