कांदा आणि मक्याच्या दरात सातत्याने होत असलेल्या घसरणीमुळे कांदा व मका उत्पादक शेतकरी आक्रमक झाले आहेत. नाशिक जिल्ह्यातील चांदवड येथील बाजार समितीच्या आवारात शेतकऱ्यांनी आमरण उपोषणाला सुरुवात केली आहे. उपोषणापूर्वी शेतकऱ्यांनी बाजार समिती परिसरात एकत्र येत मोठे आंदोलन उभारण्याचे आवाहन केले. या आवाहनाला प्रतिसाद देत मोठ्या संख्येने शेतकरी एकत्र जमले असून जोरदार घोषणाबाजी करण्यात येत आहे. गेल्या वर्षभरात कांदा आणि मक्याला योग्य दर मिळाला नसल्यामुळे हे आंदोलन छेडण्यात आल्याचे शेतकऱ्यांनी सांगितले. कांद्याला हमीभाव मिळावा, मक्याचे घसरलेले दर पूर्ववत करावेत तसेच मक्याची शासकीय खरेदी अत्यंत संथ गतीने सुरू असल्याने ती तातडीने वाढवावी, अशी प्रमुख मागणी आंदोलनकर्त्यांनी केली आहे. दरम्यान, शासनाने या आंदोलनाची तात्काळ दखल न घेतल्यास भविष्यात आंदोलन अधिक तीव्र करून विविध मार्गांनी सुरू ठेवण्याचा इशारा शेतकऱ्यांनी दिला आहे.
