महाराष्ट्र जिल्हा परिषद आणि पंचायत समिती निवडणूक 2026 च्या निकालांमध्ये विविध जिल्ह्यांमध्ये संमिश्र चित्र पाहायला मिळत आहे. पुणे जिल्ह्यातील मुळशी तालुक्यातील पिरंगुट गणातून पवारांच्या राष्ट्रवादी काँग्रेसचे राहुल पवळे विजयी झाले आहेत.
लातूर जिल्ह्यात काँग्रेसने जिल्हा परिषद आणि पंचायत समितीमध्ये जोरदार मुसंडी मारली आहे. दुसरीकडे, कणकवलीमध्ये मंत्री नितेश राणे यांच्या नेतृत्वाखाली भाजपने विजयाचा जल्लोष साजरा केला. संपूर्ण सिंधुदुर्ग जिल्ह्यात भाजपने आपला झेंडा फडकवला असून, 18 जागांवर आघाडी घेतली आहे. शिंदे गटाच्या शिवसेनेला सात जागा मिळाल्या, तर राष्ट्रवादी काँग्रेसला येथे खातेही उघडता आले नाही. यामुळे सिंधुदुर्गमध्ये भाजप सर्वात मोठा पक्ष ठरला आहे.
धाराशिव जिल्ह्यात भाजप सहा, शिवसेना पाच, राष्ट्रवादी काँग्रेस तीन, काँग्रेस चार आणि ठाकरेंची शिवसेना चार जागांवर आघाडीवर आहेत. धाराशिवमध्ये भाजपने चांगली कामगिरी केली असून, ठाकरेंच्या शिवसेनेसाठी हा एक मोठा धक्का मानला जात आहे. सोलापूरमध्ये भाजपने एकहाती सत्ता मिळवत 17 जागांवर विजय मिळवला आहे. शिवसेना पाच आणि राष्ट्रवादी काँग्रेस आठ जागांवर विजयी झाली आहे, तर महाविकास आघाडीला इथे खातेही उघडता आले नसल्याचे वृत्त आहे.
