मुंबई : राजधानी मुंबईतील (Mumbai) शिवाजी पार्कजवळ म्हणजे शिवसेना भवनजवळ शिवसैनिक किंवा मनसैनिक बॅनरबाजी करत असतात. येथील बॅनर अनेकदा चर्चेचा विषय ठरतात, त्यावरुन माध्यमांमध्ये चर्चाही होते. आता, मनसेप्रमुख (MNS) राज ठाकरेंच्या घराजवळ, शिवसेना भवनजवळ लावलेल्या बॅनरबाजीवरुन आता वाद निर्माण झाल्याचं दिसून येत आहे. कारण, राज ठाकरे (Raj Thackeray) यांना हे बॅनर आवडले असून त्यांनी तात्काळ हे पोस्टर काढण्याच्या सूचना केल्या. त्यानंतर, मनसेचे मुंबई शहर उपाध्यक्ष यशवंत किल्लेदार यांनी हे बॅनर उतरवले असून कार्यकर्ते उत्साहापोटी आणि प्रसिद्धीसाठी असे बॅनर लावतात, असेही त्यांनी म्हटलंय.
शिवाजी पार्क, शिवसेना भवन परिसरात ठाकरे बंधू यांचे एकत्रित बॅनर लावण्यात आले होते. ‘ठाकरेंचा सेवक तोच मुंबईचा नगरसेवक‘ असा आशय बॅनरवर पाहायला मिळत होता. कुर्ला येथील मनसैनिक लक्की वामन कर्डक यांच्याकडून हे बॅनर लावण्यात आले होते. बॅनरवरील आशय मनसे अध्यक्ष राज ठाकरे यांना आवडली नाही, त्यामुळे हे बॅनर त्वरित काढून टाकावे अशा सुचना मनसे मुंबई शहर उपाध्यक्ष यशवंत किल्लेदार यांना देण्यात आल्या होत्या. त्यानंतर, किल्लेदार यांनी त्वरित हे बॅनर काढून टाकले आहेत. दरम्यान, या बॅनरवरील ठाकरेंचा सेवक.. या शब्दाला आक्षेप घेत हे बॅनर उतरवण्यात आले आहेत.
दरम्यान, शिवसेना भवन किंवा शिवाजी पार्क परिसरात अनेक कार्यकर्ते स्वत:हून बॅनर लावतात, ती पक्षाची भूमिका नसते. बहुतांश वेळा कार्यकर्ते नेत्यांचं लक्ष वेधण्यासाठी किंवा प्रसिद्धी मिळवण्यासाठी असा अट्टाहास करतात, असे यशवंत किल्लेदार यांनी म्हटलं आहे.
शिवसेनेच्या किशोरी पेडणेकरांची भूमिका
मुंबईतील शिवसेना भवनसमोर लावण्यात आलेल्या पोस्टरवरही किशोरी पेडणेकर यांनी आपली भूमिका मांडली. ते पोस्टर कोणी लावलं होतं हे बघितलं पाहिजे. जर ते पोस्टर त्यांनीच लावलं असेल, त्यांच्या पक्षाने ते काढलं असेल तर त्यावर त्यांनाच विचारलं पाहिजे, असे पेडणेकर यांनी म्हटलं. उमेदवारांना फॉर्म वाटप करण्याआधी युती व्हायला हवी, आता दोन नेते युती कधी करायची हे लवकर ठरवतील. याशिवाय कोणाला तिकीट द्यायचं हे दोन ठाकरेंना ठरवू द्यात, असेही किशोरी पेडणेकर यांनी म्हटले.
शिवसेनेत नव्या चेहऱ्यांना संधी
मी शाखा प्रमुख याला विचारलं तो म्हणाला आपल्या लोकांनी लावलेला नाही, पक्षप्रमुख यावर निर्णय घेतील. मी सगळ्यांना सोबत घेऊन काम करते, बट नॅचरलं आहे, निवडणूक जवळ येत असल्याने हे होणार, असे म्हणत नव्या चेहऱ्यांना संधी द्या अशा आशयाच्या बॅनरवर किशोरी पेडणेकर यांनी आपली भूमिका स्पष्ट केली.
शिंदेंच्या पक्षाकडून महिलांसोबत बनवाबनवी
स्थानिक स्वराज्य संस्था मध्ये महिलांना अधिकाधिक स्थान मिळावं हा उद्देश आहे, शरद पवार यांनी हे केलं, त्याबद्दल आम्ही त्यांचे आभार मानत असतो. महिलांसोबत बनवावनवी शिंदेंच्या पक्षाकडून केली जाईल, जशी 1500 रुपये दिले, असा टोलाही पेडणकेर यांनी म्हटले. महापालिकेतील आरक्षण लॉटरीला आपण काही बोलू शकत नाही. पारदर्शक लॉटरी निघाली, अनेक लोकांना फटका बसला याचं आम्हाला वाईट वाटतं. आशिष चेंबूरकर आहे, रवी राजा यांचा सुद्धा वॉर्ड आहे, त्यामुळे याबाबत पक्ष निर्णय घेईल, असेही पेडणेकर यांनी म्हटलं.
हेही वाचा
अजितदादांनी एका हाताने काढून घेतलं, पण दुसऱ्या हाताने भरभरुन दिलं, अमोल मिटकरींवर नवी जबाबदारी
आणखी वाचा
