आयसीसी टी 20I वर्ल्ड कप 2026 स्पर्धेतील 33 व्या सामन्यात सी ग्रुपमधील नेपाल विरुद्ध स्कॉटलंड आमनेसामने आहेत. हा सामना मुंबईतील वानखेडे स्टेडियममध्ये खेळवण्यात येत आहे. दोन्ही संघांचा हा या मोहिमेतील साखळी फेरीतील चौथा आणि शेवटचा सामना आहे. स्कॉलंडने नेपाळसमोर या सामन्यात 171 धावांचं आव्हान ठेवलं आहे. स्कॉटलंडने 20 ओव्हरमध्ये 7 विकेट्स गमावून 170 धावा केल्या. स्कॉटलंडच्या फलंदाजांनी त्यांनी पहिल्या 2 विकेटसाठी अर्धशतकी भागीदारी करुन टीमला 170 धावांपर्यंत पोहचवलं. आता त्यांचे गोलंदाज या धावांचा बचाव करण्यात यशस्वी ठरणार की नेपाळ पहिला विजय मिळवणार? हे थोड्याच वेळात स्पष्ट होईल.
स्कॉटलंडची बॅटिंग
स्कॉटलंडला सन्मानजनक धावसंख्येपर्यंत पोहचवण्यासाठी पहिल्या 4 फलंदाजांनी प्रमुख योगदान दिलं. स्कॉटलंडची ज्या हिशोबाने बॅटिंग सुरु होती त्यानुसार ते सहज 200 धावा करतील असं चित्र होतं. मात्र नेपाळने निर्णायक क्षणी कमबॅक केलं आणि स्कॉटलंडला झटके दिले. नेपाळने काही विकेट्स मिळवल्या आणि स्कॉटलंडला मोठी धावसंख्या उभारण्यापासून रोखण्यात यश मिळवलं. स्कॉटलंडसाठी मायकल जोन्स याने सर्वाधिक धावा केल्या. जोन्सने अर्धशतक केलं. जॉर्ज मुन्सी याने 27 धावा जोडल्या. तर कॅप्टन रिची बेरिंग्टन आणि मार्क वॅट या दोघांनी प्रत्येकी 10-10 धावा जोडल्या.
स्कॉटलंडची कडक सुरुवात
नेपाळने टॉस जिंकला आणि स्कॉटलंडला बॅटिंगसाठी बोलावलं. जॉर्ज मुन्सी आणि मायकल जोन्स या सलामी जोडीने स्कॉटलंडला आक्रमक सुरुवात करुन दिली. या दोघांनी 80 धावांची भागीदारी केली. मुन्सीच्या रुपात स्कॉटलंडने पहिली विकेट गमावली. मुन्सीने 29 बॉलमध्ये 4 फोरसह 27 रन्स केल्या.
मुन्सी आऊट झाल्यानंतर जॉर्जला साथ देण्यासाठी ब्रँडन मॅकमुलेन मैदानात आला. जॉर्ज आणि मॅकमुलेन या दोघांनीही दुसऱ्या विकेटसाठी अर्धशतकी भागीदारी केली. या जोडीने 32 चेंडूत 52 धावांचं योगदान दिलं. त्यानंतर मायकल जोन्स याने 71 धावा करुन मैदानाबाहेरचा रस्ता धरला. मॅकमुलेन याने 1 सिक्स आणि 1 फोरसह 25 रन्स केल्या. मात्र त्यानंतर नेपाळने कमबॅक केल्याने एकालाही खास करता आलं नाही. नेपाळसाठी सोमपाल कामी याने सर्वाधिक 3 विकेट्स मिळवल्या. नंदन यादव याने दोघांना मैदानाबाहेरचा रस्ता दाखवला. तर कॅप्टन रोहित पॉडेल आणि कौशल भुर्टेल या दोघांनी प्रत्येकी 1-1 विकेट मिळवली.
