Thane to Navi Mumbai Elevated Road : नवी मुंबईतील आंतरराष्ट्रीय विमानतळाचे (Navi Mumbai International Airport) उद्घाटन 8 ऑक्टोबर रोजी होणार असून, त्याच पार्श्वभूमीवर ठाणे (Thane) ते नवी मुंबई विमानतळाला जोडणाऱ्या नव्या उन्नत (एलिव्हेटेड) रस्त्याला (Elevated Road) अंतिम मंजुरी देण्यात आली आहे. सिडकोने तयार केलेल्या या प्रस्तावानुसार, ठाणे ते विमानतळादरम्यान सुमारे 26 किलोमीटर लांबीचा एलिव्हेटेड मार्ग बांधण्यात येणार आहे. या मार्गामुळे प्रवासाचा कालावधी सध्या लागणाऱ्या वेळेच्या तुलनेत लक्षणीय कमी होणार असून, ठाणे ते नवी मुंबई विमानतळाचा प्रवास केवळ 45 मिनिटांत पूर्ण करता येणार आहे.
सध्या ठाणे आणि नवी मुंबई दरम्यान प्रवासासाठी ठाणे-बेलापूर रोड आणि पाम बीच रोड हे दोन प्रमुख पर्याय उपलब्ध आहेत. मात्र, या दोन्ही मार्गांवर मोठ्या प्रमाणावर वाहतूक होत असल्यामुळे प्रवाशांना प्रचंड वाहतूक कोंडीचा सामना करावा लागतो. त्यामुळे वेळ आणि इंधन दोन्हीचा अपव्यय होत असल्याचे वारंवार निदर्शनास आले आहे. त्याशिवाय, मुंबईतील अटल सेतू थेट नवी मुंबईशी जोडलेला असला तरी त्याला ठाण्याशी थेट जोडणारा मार्ग नाही. यामुळे ठाणे आणि नवी मुंबई या भागातील कनेक्टिव्हिटी वाढवणे आवश्यक झाले होते. याच उद्देशाने एलिव्हेटेड रोडची संकल्पना पुढे आली आणि आता त्याला मान्यता मिळाली आहे.
एलिव्हेटेड रोडचा मार्ग आणि रचना कशी असेल? (Thane to Navi Mumbai Elevated Road)
– हा उन्नत मार्ग ठाण्यातील पटणी मैदानापासून, म्हणजेच धन निरंकारी चौकापासून सुरू होणार आहे.
– यानंतर हा मार्ग ठाणे-बेलापूर रोडला समांतर 17 किलोमीटरचा प्रवास करत वाशीपर्यंत पोहोचेल.
– त्यानंतर, वाशी ते नवी मुंबई विमानतळापर्यंत 9 किलोमीटरचा भाग दुमजली (डबल-डेकर) एलिव्हेटेड रस्त्याच्या स्वरूपात उभारण्यात येणार आहे.
पर्यावरणाच्या दृष्टीने महत्त्वाची माहिती (Thane to Navi Mumbai Elevated Road)
पटणी मैदान ते वाशी या पहिल्या टप्प्यातील मार्गावर पर्यावरणविषयक अडचणी तुलनेने कमी आहेत. मात्र, वाशीपासून विमानतळापर्यंतचा दुसरा टप्पा काही प्रमाणात खारफुटी व किनारपट्टीच्या भागातून जात असल्यामुळे त्या भागात पर्यावरणीय परवानग्यांची गरज भासू शकते.
अंदाजे खर्च आणि फायदे (Thane to Navi Mumbai Elevated Road)
या संपूर्ण प्रकल्पासाठी सुमारे 8,000 कोटी रुपयांचा खर्च अपेक्षित आहे. एकदा हा मार्ग कार्यान्वित झाल्यानंतर, फक्त प्रवासाचा वेळच नव्हे, तर इंधनाचीही मोठी बचत होणार आहे. तसेच, ठाणे व नवी मुंबईतील औद्योगिक क्षेत्रांनाही जलद व सुलभ दळणवळणाचा फायदा मिळणार आहे.
आणखी वाचा
आणखी वाचा
