अमेरिका आणि इराणमध्ये तब्बल 40 दिवसांनंतर युद्धविराम झाला आहे. बुधवारी युद्धविरामाची घोषणा करण्यात आली. इराण आणि अमेरिकेमध्ये युद्धविराम व्हावा यासाठी पाकिस्तानने पुढाकार घेतला. पाकिस्तानमुळे युद्धविराम घडवून आल्यामुळे पुन्हा एकदा पाकिस्तान चर्चेमध्ये आलं आहे. मात्र आता पाकिस्तानची पोलखोल झाली आहे. आंतरराष्ट्रीय राजकारणात फक्त औपचारिक चर्चाच नाही तर पडद्यामागे घडणाऱ्या घडामोडी देखील मोठ्या निर्णयाची पार्श्वभूमी तयार करतात. असाच डाव अमेरिकेने इराणसोबत युद्धविराम घडवून आणण्यासाठी टाकल्याचा पहायला मिळत आहे. इराणसोबत युद्धविराम घडवून आणण्यासाठी अमेरिकेनं पाकिस्तानचं एक माध्यम म्हणून उपयोग केला आहे.
लंडनमधील वृत्तपत्र फायनांशियल टाइम्सच्या एका रिपोर्टनुसार डोनाल्ड ट्रम्प यांनी इराणसोबत थेट बोलणं टाळलं, त्याऐवजी त्यांनी पाकिस्तानला पुढं केलं. पाकिस्तानच्या माध्यमातून त्यांनी आपलं म्हणणं इराणपर्यंत पोहोचवलं. त्यांनी पाकिस्तानचा उपयोग एक असा संदेश वाहक म्हणून केला, की जो अमेरिकेच्या अटी आणि प्रस्ताव इराणपर्यंत पोहचू शकेल. या रिपोर्टमध्ये पुढे असा दावा देखील करण्यात आला आहे की, यामागे डोनाल्ड ट्रम्प यांची अशी रणनीती होती की, पाकिस्तान हा इराणचा शेजारी देश आहे, तसेच तो मुस्लिम बहुल देश आहे. त्यामुळे जर पाकिस्तानने अमेरिकेचा निरोप इराणपर्यंत पोहोचवला तर इराण त्याचा स्वीकार करू शकतो.
मात्र यामुळे आता पाकिस्तानच्या राजनैतिक स्वायत्तेबाबत प्रश्न उपस्थित करण्यात येत आहे. या वृत्तपत्राने आपल्या रिपोर्टमध्ये असं म्हटलं आहे की, युद्धविराम घडवून आणण्याची जबाबदारी अमेरिकेनं पाकिस्तानवर सोपावली, त्यासाठी गेले काही दिवस पाकिस्तानसोबत डोनाल्ड ट्रम्प यांची अत्यंत गुप्तपणे चर्चा सुरू होती. डोनाल्ड ट्रम्प यांनी पाकिस्तानच्या खांद्यावर बंदुक ठेवून आपला उद्देश साध्य करून घेतला आहे.
या सर्वांमध्ये पाकिस्तानचे फिल्ड मार्शल आसीम मुनीर यांनी महत्त्वाची भूमिका होती, ते सातत्याने इराण आणि अमेरिकेच्या संर्पकात होते. इराणने स्ट्रीट ऑफ होमूर्ज पुन्हा एकदा सुरू करावा, यासाठी डोनाल्ड ट्रम्प यांचा प्रयत्न सुरू होता, अखेर त्यासाठी त्यांनी पाकिस्तानला मध्यस्थ केलं, आणि त्यानंतर युद्धविरामाची घोषणा झाली.
