काही दिवसांपूर्वी कलिंगड खाल्ल्याने एका कुटुंबातील चार जणांचा मृत्यू झाल्याचे समोर आले होते. पुढे तपासानंतर त्या कुटुंबतील सदस्यांनी खाल्लेल्या कलिंगडात उंदीर मारणाऱ्या औषधात असलेल्या झिंक फॉस्पाईडचा अशं असल्याचे समोर आले होते.
दरम्यान, आता अहिल्यानगरच्या पाथर्डी शहरात केमिकलयुक्त आंबा विक्री होत असल्याचा दावा केला जातोय. या दाव्यानंतर पंचायत समिती आणि आरोग्य विभागाने संयुक्त तपासणी मोहीम राबवली.
कॅल्शियम कार्बाईटसारख्या रसायनांचा वापर करून आंबे पिकवले जात असल्याचा संशय आल्याने विविध विक्रेत्यांकडून आंब्यांचे नमुने ताब्यात घेण्यात आले आहेत. हे नमुने पुढील तपासणीसाठी पुण्यातील प्रयोगशाळेत पाठविण्यात येणार आहेत.
केमिकलयुक्त आंब्यांमुळे लहान मुलांसह नागरिकांच्या आरोग्यावर गंभीर परिणाम होण्याची शक्यता व्यक्त केली जात आहे. विषबाधा, पोटाचे विकार आणि इतर आजार टाळण्यासाठी ही कारवाई करण्यात आल्याची माहिती आरोग्य विभागाने दिली.
दरम्यान, तपासणी अहवाल आल्यानंतर संबंधित विक्रेत्यांवर पुढील कारवाई होण्याची शक्यता असून या मोहिमेमुळे पाथर्डी शहरातील फळविक्रेत्यांमध्ये खळबळ उडाली आहे.
