KKR IPL Playoff: सात पैकी एक सामना जिंकलेल्या केकेआरला प्लेऑफची संधी, कसं काय ते समजून घ्या Image Credit source: IPL/BCCI
आयपीएल 2026 स्पर्धेत जवळपास सर्वच संघांनी 14 पैकी 7 सामने खेळले आहे. या सात सामन्यांच्या खेळात प्लेऑफचं अर्ध चित्र स्पष्ट झालं आहे. पण आता येथून पुढे टॉप 4 मध्ये जागा मिळवण्यासाठी चुरस वाढणार आहे. त्यामुळे प्रत्येक संघ येत्या सामन्यात जोर लावणार आहे. आयपीएल स्पर्धेत सर्वात सुमार कामगिरीची नोंद ही कोलकाता नाईट रायडर्सच्या नावावर आहे. कारण या संघाने आतापर्यंत फक्त एकच सामना जिंकला आहे. तर एक सामना पावसामुळे रद्द झाल्याने पदरात 1 गुण पडला आहे. कोलकाता नाईट रायडर्स संघ गुणतालिकेत 3 गुण आणि -0.879 नेट रनरेटसह सर्वात शेवटच्या स्थानावर आहे. त्यामुळे या संघाची प्लेऑफची वाट बिकट झाली आहे. पण संधी अजूनही आहे. त्यामुळे कोलकाता नाईट रायडर्सला उर्वरित सामन्यात चांगली कामगिरी करावी लागणार आहे.
कोलकाता नाईट रायडर्स संघ उपांत्य फेरी कशी गाठणार?
आयपीएल 2026 स्पर्धेतील गुणतालिकेचं गणित पाहिलं तर जो संघ 16 गुणांची कमाई करेल त्याला प्लेऑफमध्ये खेळण्याची संधी मिळेल. त्यामुळे कोलकाता नाईट रायडर्सकडे उर्वरित सात सामन्यात ही संधी आहे. पण कोलकाता नाईट रायडर्ससाठी येथून पुढे प्रत्येक सामना हा करो या मरोची लढाई असणार आहे. कोलकाता नाईट रायडर्सला आता 7 सामने खेळायचे असून प्रत्येक सामन्यात विजय मिळवला तर 14 गुण होतील आणि आधीचे 3 गुण पकडले तर 17 गुणांची कमाई होईल. त्यामुळे प्लेऑफमधील जागा पक्की होईल. सात पैकी एखादा सामना गमावला तर 15 गुण होतील. असं झालं तर गणित जर तर वर येईल. पण काठावर पास होण्याची शक्यता आहे. त्यामुळे कोलकाता नाईट रायडर्सकडे अजूनही संधी आहे.
कोलकाता नाईट रायडर्सचे सामने
- कोलकाता नाईट रायडर्स विरुद्ध लखनौ सुपर जायंट्स, 26 एप्रिल 2026
- कोलकाता नाईट रायडर्स विरुद्ध सनरायझर्स हैदराबाद, 3 मे 2026
- कोलकाता नाईट रायडर्स विरुद्ध दिल्ली कॅपिटल्स, 8 मे 2026
- कोलकाता नाईट रायडर्स विरुद्ध रॉयल चॅलेंजर्स बंगळुरू, 13 मे 2026
- कोलकाता नाईट रायडर्स विरुद्ध गुजरात टायटन्स, 16 मे 2026
- कोलकाता नाईट रायडर्स विरुद्ध मुंबई इंडियन्स, 20 मे 2026
- कोलकाता नाईट रायडर्स विरुद्ध दिल्ली कॅपिटल्स, 24 मे 2026
