उन्हाळा म्हणजे आंब्याचा हंगाम. गोड आणि आंबट चवीचे रसरशीत आंबा खाण्यास आरोग्यास सर्वोत्तम मानला जातो. तर या हंगामात आपल्या प्रत्येकाच्या घरात आंब्यापासून अनेक पेयं तसेच वेगवेगळे गोड पदार्थ बनवले जातात. पण तुम्ही कधी पिकलेल्या आंब्यापासून लाडू बनवले आहेत का? नसेल तर हे लाडू केवळ चविष्टच नाही तर बनवायलाही खूप सोपे आहेत. नारळाच्या चवीचे हे आंब्याचे लाडू अगदी कमी वेळात तयार होतात. त्यासाठी फक्त तीन गोष्टी लागतात. या उन्हाळ्यात हे लाडू नक्की करून पहा. चला तर मग आजच्या लेखात आपण शेफ कुणाल यांनी शेअर केलेली आंब्याचे लाडूंची रेसिपी जाणून घेऊयात.
आंब्याला फळांचा राजा असे उगाच म्हटले जात नाही. त्याची चव प्रत्येकाच्या मनाला भुरळ पाडते. म्हणूनच आपल्यापैकी प्रत्येकाला पिकलेले आंबे खायला आवडतात आणि त्यापासून विविध प्रकारचे पदार्थही बनवायला आवडतात.
आंबा नारळ लाडू बनवण्यासाठी लागणारे साहित्य
तुम्हाला अर्धा कप पिकलेल्या आंब्याचा गर, पाऊण कप कंडेन्स्ड मिल्क आणि दोन कप किसलेले खोबरे लागेल. आता चविष्ट पिकलेल्या आंब्याचे लाडू कसे बनवायचे ते जाणून घेऊयात.
आंबा-नारळ लाडू रेसिपी
- सर्वप्रथम आंबा कापून घ्या आणि नंतर त्याचा गर वेगळा करून मिक्सरमध्ये बारीक वाटून घ्या.
- तयार केलेला गर एका मोठ्या भांड्यात काढा आणि हे लक्षात ठेवा की आंबा वाटताना त्यात अजिबात पाणी घालू नका.
- आंब्याचा गरात कंडेन्स्ड मिल्क मिक्स करा आणि त्यात बारीक किसलेले सुका खोबरे टाका.
- हे सर्व साहित्य चांगले मिक्स करा. यामुळे एक घट्ट मिश्रण तयार होईल.
- आता मंद आचेवर जाड बुडाचे भांडे ठेवा आणि त्यात संपूर्ण मिश्रण टाका.
- ते सतत ढवळत थोडा वेळ शिजवा, जेणेकरून त्यातील ओलावा कमी होईल आणि लाडू बनवण्याइतके घट्ट होईल.
- आता ते एका प्लेटमध्ये काढून पूर्णपणे थंड होण्यासाठी बाजूला ठेवा.
- तुम्ही मिश्रणाचे एक एक करून लाडू बनवा. या प्रत्येक लाडूला सुक्या नारळाचा किस लावा.
पोषक तत्वांनी समृद्ध
नारळ आपल्या आरोग्यासाठी फायदेशीर आहे हे सर्वांनाच माहीत आहे, कारण त्यात अनेक खनिजे आणि चांगले फॅट्स भरपूर प्रमाणात असतात. आंबा देखील व्हिटॅमिन सी आणि इतर अनेक पोषक तत्वांचा चांगला स्रोत आहे, तर गोडवा आणण्यासाठी वापरले जाणारे कंडेन्स्ड मिल्क देखील फायदेशीर आहे, कारण त्यात 60 टक्के मिल्क पावडर वापरलेली असते.
( डिस्क्लेमर : या आर्टिकलमध्ये देण्यात आलेली माहिती व उपाय हे सामान्य ज्ञानावर आधारित आहेत. आमचा याला दुजोरा नाही. ते अवलंबण्यापूर्वी तज्ज्ञांचा सल्ला जरूर घ्यावा.)
