आयपीएल स्पर्धेच्या 19 व्या मोसमात युवा वेगवान गोलंदाज प्रिंस यादव हा लखनौ सुपर जायंट्सचं टीमचं प्रतिनिधित्व करत आहे. आपल्याला आगामी वनडे वर्ल्ड कप 2027 स्पर्धेत रोहित शर्मा आणि विराट कोहली या दोघांसह खेळायचंय, अशी इच्छा प्रिंस यादव याने बोलून दाखवलीय. तसेच प्रिंसने गुरुवारी 7 मे रोजी आरसीबी विरूद्धच्या सामन्यात एकाना स्टेडियममध्ये विराट कोहली याच्या सारख्या अनुभवी आणि दिग्गज फलंदाजाला झिरोवर आऊट केलं. विशेष म्हणजे बॅटिंगने चेंडूची कत्तल करणाऱ्या विराटला प्रिंसने बोल्ड केलं. प्रिंसने विराटला बोल्ड करुन क्रिकेट चाहत्यांचं लक्ष वेधून घेतलं. त्यानंतर आता प्रिंसचं टीम इंडियासाठी खेळण्याचं स्वप्न होऊ शकतं, असं म्हटलं जात आहे.
प्रिंसला टी 20 टीम इंडियात चक्क यॉर्कर किंग जसप्रीत बुमराह याच्या जागी खेळण्याची संधी मिळणार असल्याचं म्हटलं जात आहे. मीडिया रिपोर्ट्सनुसार, टीम इंडियाच्या 2026 च्या टी 20i वर्ल्ड कप विजयानंतर जसप्रीत बुमराहसाठी बीसीसीआय वर्कलोड मॅनेजमेंटनुसार प्लान तयार करत आहे.
बीसीसीआयचा प्लान काय?
मीडिया रिपोर्ट्सनुसार, बीसीसीआय बुमराहला दीड ते 2 वर्षांसाठी टी 20 टीममधून विश्रांती देणार असल्याचं म्हटलं जात आहे. बुमराहला कसोटी क्रिकेट (WTC) आणि आगामी वनडे वर्ल्ड कप 2027 स्पर्धेत पूर्ण ताकदीने खेळता यावं यासाठी त्याला एकदिवसीय आणि इतर मालिकेतून विश्रांती देण्यात येणार असल्याचा प्लान बीसीसीआयचा आहे. मात्र याबाबत कोणतीही अधिकृत माहिती देण्यात आलेली नाही.
त्यामुळे आता बुमराहच्या जागी प्रिंसला टी 20 टीम इंडियात संधी देण्याची तयारी सुरु असल्याचं म्हटलं जात आहे. प्रिंसने आयपीएल 2026 स्पर्धेत आपल्या स्विंगच्या जोरावर फलंदाजांना गुंडाळलं आहे. तसेच क्रिकेट चाहत्यांना प्रभावित केलंय. त्यामुळे आता प्रिंसला संधी मिळणार की नाही हे पाहणं महत्त्वाचं ठरणार आहे.
प्रिंस यादव याची आयपीएल कारकीर्द
दरम्यान प्रिंस यादव याचा आयपीएल कारकीर्दीतील दुसरा मोसम आहे. प्रिंसने आतापर्यंत लखनौचं 10 सामन्यांत प्रतिनिधित्व केलं आहे. प्रिंसने एकूण 16 आयपीएल विकेट्स मिळवल्या आहेत. प्रिंसने या दरम्यान 8.8 च्या सन्मानजनक इकॉनमीने धावा दिल्या. तसेच प्रिंस 19 व्या मोसमात सर्वाधिक विकेट्स घेणाऱ्या गोलंदाजांच्या यादीत तिसऱ्या स्थानी आहे.
