शारिब हाश्मी, नसरीन हाश्मीImage Credit source: Instagram
‘द फॅमिली मॅन’ या वेब सीरिजमध्ये जेके तळपदेची भूमिका साकारून अभिनेता शारिब हाश्मी घराघरात पोहोचला. खऱ्या आयुष्यातही शारिब एक सच्चा फॅमिली मॅन आहे. नुकत्याच दिलेल्या एका मुलाखतीत तो पत्नी नसरीन हाश्मीसोबत उपस्थित होता. या मुलाखतीत दोघं त्यांच्या आयुष्यातील प्रवासाबद्दल मोकळेपणे व्यक्त झाले. शारिबच्या पत्नीने पाच वेळा कॅन्सरशी झुंज दिली आहे. 2018 मध्ये तिला कॅन्सरचं निदान झालं होतं. तेव्हापासून ती या जीवघेण्या आजाराचा सामना अत्यंत धाडसाने करत आहे.
‘हॉटरफ्लाय’ला दिलेल्या मुलाखतीत नसरीनने सांगितलं की, जेव्हा शारिबला पहिल्यांदा कॅन्सरबद्दल समजलं, तेव्हा तो पूर्णपणे खचला होता. याबद्दल शारिब म्हणाला, “तिच्यावर आतापर्यंत पाच वेळा सर्जरी झाली आहे. पाच वेळा तिला कॅन्सर झाला आहे आणि आता सहाव्यांदाही ती या आजाराशी झुंज देत आहे. यावेळी कॅन्सर तिच्या पूर्ण शरीरात पसरला आहे. हा वेळसुद्धा निघून जाईल, सध्या तिच्यावर उपचार सुरू आहेत. ज्याप्रकारे ती या आजाराचा सामना करत होती, त्याने आम्हा सर्वांना पूर्ण हिंमत मिळत होती. पाच वेळा कॅन्सर होऊनही तिने अत्यंत धाडसाने सगळ्या गोष्टी सहन केल्या आहेत. ती लढतेय.”
यावेळी नसरीननेही शारिबच्या पाठिंब्याचं कौतुक केलं. “तो माझ्यासोबत नेहमी उभा राहतो. शूटिंगचं शेड्युल कितीही व्यस्त असलं तरी त्यातून वेळ काढून तो रुग्णालयात पोहोचतो. रुग्णालयात दाखल होण्यापासून डिस्चार्ज मिळेपर्यंत तो त्याची बॅग घेऊन तिथेच बसतो. अजिबात हलत नाही. माझ्यासाठी तो तिथे असणंच खूप आहे. त्याच्या फक्त असण्यानेच मला शांती मिळते. आयुष्याच्या विविध टप्प्यांवर त्याने माझी खूप साथ दिली आहे”, अशा शब्दांत ती व्यक्त झाली.
शारिब हाश्मी आणि नसरीन यांनी 27 डिसेंबर 2003 रोजी लग्न केलं. या दोघांना एक मुलगा आणि एक मुलगी आहे. किशोरवयात असताना या दोघांची पहिली भेट झाली होती आणि गेल्या 30 वर्षांहून अधिक काळापासून शारिब आणि नसरीन एकमेकांसोबत आहेत. शारिबने त्याच्या करिअरची सुरुवात शाहरुख खानसोबत केली होती. त्यानंतर ‘फिल्मीस्तान’ आणि ‘द फॅमिली मॅन’ यांसारख्या वेब सीरिजमुळे त्याला लोकप्रियता मिळाली.
