विधानसभा निवडणुकीमध्ये महायुतीला मोठं यश मिळालं होतं, तर महाविकास आघाडीचा मोठा पराभव झाला होता. या पराभवानंतर महाविकास आघाडीला गळती लागल्याचं पहायला मिळालं, अनेक दिग्गज नेत्यांनी महायुतीमध्ये पक्षप्रवेश केला. याचा सर्वाधिक फटका हा शिवसेना ठाकरे गटाला बसला. शिवसेना ठाकरे गटातील अनेक बड्या नेत्यांनी विधानसभा निवडणुकीनंतर शिवेसेना शिंदे गटात प्रवेश केला. त्यातच सध्या आता ऑपरेशन टायगरची देखील चर्चा आहे. दरम्यान आज शिवसेना ठाकरे गटाचे खासदार नागेश पाटील आष्टीकर यांनी शिवसेना शिंदे गटाचे सर्वेसर्वा एकनाथ शिंदे यांची भेट घेतल्यानं राजकीय वर्तुळात चर्चेला उधाण आलं आहे. यावर आता नागेश पाटील आष्टीकर याची पहिली प्रतिक्रिया समोर आली आहे, त्यांनी या सर्व चर्चांना पूर्णविराम दिला आहे.
नेमकं काय म्हणाले आष्टीकर
आज नागेश पाटील आष्टीकर यांनी उपमुख्यमंत्री एकनाथ शिंदे यांची भेट घेतली, या भेटीनंतर चर्चेला उधाण आलं आहे. पुन्हा एकदा शिवसेना शिंदे गटाच्या ऑपरेशन टायगरची चर्चा सुरू झाली आहे. यावर आता आष्टीकर यांची पहिली प्रतिक्रिया समोर आली आहे. मी मतदार संघातील वडगाव इथल्या ट्रॅफिक समस्येबाबत एकनाथ शिंदे यांना आज पत्र दिलं आहे, त्यांची भेट घेतली आहे, असं स्पष्टीकर या भेटीवर आष्टीकर यांनी दिलं आहे. दरम्यान काही प्रसार माध्यमांनी अशा देखील बातम्या चालवल्या की आष्टीकर यांना शिंदेंनी बंगल्यावर तब्बल पाऊल तास वाट पहायला लावली, या बातमीवरून देखील आष्टीकर यांनी चांगलाच संताप व्यक्त केला आहे.
‘ काहींनी बातम्या चालवल्या की मला पाऊण तास बंगल्यावर थांबवण्यात आलं. आम्ही विरोधी पक्षातले खासदार आहोत, त्यामुळे ते आम्हाला लगेच बोलवतील अशातला काही भाग नाही. त्यामुळे त्यांनी जेव्हा मला बोलावलं तेव्हा मी गेलो आणि ते पत्र दिलं. ही भेट विकास कामासंदर्भात होती, ऑपरेशन टायगर वगैरे काहीही नाही, आणि जर असेल तर निदान आम्हाला तरी सांगा म्हणजे आम्ही आमची भूमिका मांडू, मला जर जायचं असेल तर मी सांगून जाईन. या नुसत्या चर्चा आहेत, या चर्चा घडवून आणल्या जात आहेत, यामध्ये कुठलंही तथ्य नाही. आमचे नेते एकच उद्धव ठाकरे आहेत,’ असंही यावेळी आष्टीकर यांनी म्हटलं.
