अशोक खरात प्रकरणात राष्ट्रवादी अजित पवार गटाच्या नेत्या रुपाली चाकणकर या चांगल्याच चर्चेत आल्या होत्या, त्यांना या प्रकरणानंतर राज्य महिला आयोगाच्या अध्यक्षपदाचा राजीनामा देखील द्यावा लागला. दरम्यान त्यानंतर आता अशोक खरात प्रकरणावर बोलताना काँग्रेसच्या कार्यकर्त्या संगीता तिवारी यांनी रुपाली चाकणकर यांच्यावर गंभीर आरोप केले आहेत. रुपाली चाकणकर बाईंकडे इतर नेत्यांचे व्हिडीओ आहेत. त्यामुळे हे व्हिडीओ बाहेर येऊ नये म्हणून या बाईला आता क्लिन चीट देण्याचा प्रयत्न होत आहे. भाजप चाकणकर यांना आपल्या वॉशिंग मशिनमध्ये धुवून काढेल असं संगीता तिवारी यांनी म्हटलं आहे.
नेमकं काय म्हणाल्या संगीता तिवारी?
मी अजितदादांसोबत पक्षात होते, पण मी मुळात काँग्रेस पक्षाची कार्यकर्ता आहे, त्यामुळे मी पुन्हा आता काँग्रेसमध्ये आले आहे. त्यामुळे मी आता आमचे जिल्हाध्यक्ष प्रशांत जगताप यांच्या नेतृत्वात काम करत आहे. अजितदादांचा विमान अपघात झाला, त्यानंतर आता पक्षाला कोणी उरलं नाही. त्यांच्या विमान अपघातासंदर्भात चौकशी देखील होत नाहीये, त्यांच्या घरातील लोक देखील चौकशीसंदर्भात बोलत नाहीयेत. फक्त एकटे रोहित पवार हे या विमान अपघातासंदर्भात बोलत आहेत, असं संगीता तिवारी यांनी म्हटलं आहे.
दरम्यान अशोक खरातचा अजित पवार यांच्या मृत्यूशी संबध आहे, कारण या खरातच्या बँकेच्या अकाउंटमध्ये पैसे कुठून आले? आणि हे पैसे अजित दादा यांचा विमान अपघात घडण्याच्या आदल्या दिवशी तसेच विमान अपघाताच्या दिवशी आले होते, त्याचा आणि याचा काहीतरी संबंध आहे, आणि याला जबाबदार रुपाली चाकणकर या आहेत, असा गंभीर आरोप यावेळी संगीता तिवारी यांनी केला आहे.
चाकणकर यांना सुनील तटकरे यांना अजित पवार यांच्या जागी बसवायचे होते, त्यामुळे त्यांनी हे सगळं केलं आहे. हेच तटकरे आणि चाकणकर गुवाहाटीला पुजेसाठी गेले होते. रुपाली चाकणकर बाईंकडे इतर नेत्यांचे व्हिडीओ आहेत. त्यामुळे हे व्हिडीओ बाहेर येऊ नये म्हणून या बाईला आता क्लिन चीट देण्याचा प्रयत्न होत आहे. भाजप चाकणकर यांना आपल्या वॉशिंग मशिनमध्ये धुवून काढेल, असे खळबळजनक आरोप संगीता तिवारी यांच्याकडून करण्यात आले आहेत. त्यामुळे आता पुन्हा एकदा वातावरण तापण्याची शक्यता आहे.
