देशभरातील नागरिक मान्सूनच्या आगमनाची प्रतीक्षा करत असताना आता हवामान खात्याकडून महत्त्वाची माहिती समोर आली आहे. यंदा मान्सूनच्या आगमनाला विलंब होण्याची शक्यता व्यक्त करण्यात आली असून मान्सून सध्या श्रीलंका परिसरातच अडकून पडल्याचं सांगितलं जात आहे. वादळी वाऱ्यांमुळे मान्सूनच्या पुढील प्रवासाला अडथळा निर्माण झाल्याची माहिती हवामान विभागाने दिली आहे. मिळालेल्या अंदाजानुसार, केरळमध्ये मान्सून आता सुमारे सात दिवस उशिराने दाखल होण्याची शक्यता आहे. यापूर्वी मान्सून साधारणपणे 1 जूनच्या आसपास केरळमध्ये प्रवेश करत असे. मात्र यंदा हवामानातील बदल आणि वादळी परिस्थितीमुळे मान्सूनची एंट्री जवळपास 10 दिवस उशिराने होणार असल्याचं सांगितलं जात आहे.
दरम्यान, मान्सून लांबल्यामुळे जून आणि जुलै महिन्यातही उष्णतेची लाट कायम राहण्याची शक्यता वर्तवण्यात आली आहे. त्यामुळे अनेक राज्यांमध्ये तापमानाचा पारा आणखी वाढू शकतो, असा इशारा हवामान खात्याकडून देण्यात आला आहे. मान्सून उशिरा दाखल होणार असल्यामुळे शेतकरी आणि नागरिकांची चिंता वाढली असून आता हवामान विभागाच्या पुढील अंदाजाकडे संपूर्ण देशाचं लक्ष लागलं आहे.
